पुणे - जैविक कचऱ्यावर प्रक्रिया न करणाऱ्या गृहप्रकल्पांना नोटीसच बजाविण्याचे काम महापालिकेच्या घनकचरा विभागामार्फत केले जात आहे. अद्याप कोणत्याही गृहप्रकल्पावर कारवाई झाली नाही. दिवाळीनंतर या गृहप्रकल्पांतील कचरा उचलला जाणार नाही आणि कचऱ्याची विल्हेवाट लावण्यासाठी यंत्रणा उभी न करणाऱ्यांवर कारवाई केली जाईल, असा दावा विभागाने केला आहे.

नागरी घनकचरा व्यवस्थापन व हाताळणी नियमावलीनुसार गृहप्रकल्प, रुग्णालये, शैक्षणिक संस्था, हॉटेल्स, मंगल कार्यालये आदी ठिकाणी प्रतिदिन शंभर किलोहून अधिक कचरा निर्माण होत असेल, तर संबंधित संस्थेतच कचऱ्याची विल्हेवाट लावण्यासाठी कंपोस्टिंग, बायोमिथेनायझेशन किंवा इतर तंत्रज्ञानाचा उपयोग करणे बंधनकारक आहे. याची अंमलबजावणीची जबाबदारी स्थानिक स्वराज्य संस्थांवर आहे. महापालिकेने या नियमाची अंमलबजावणी करण्यासाठी गेल्यावर्षीपासून संबंधितांना नोटीस देण्यास सुरवात केली आहे. या वर्षी ही नोटीस पाठविण्यात आली आहे. हा कचरा सार्वजनिक ठिकाणी टाकल्यास कायदेशीर कारवाई केली जाईल, असे या नोटिशीमध्ये नमूद केले आहे. गेल्यावर्षी नोटीस दिल्यानंतर कोणत्याही संस्थेने कचरा प्रक्रिया करण्यासाठी व्यवस्था केली नसल्याचे प्रशासनाच्या निदर्शनास आले आहे. अद्याप महापालिकेने कचरा उचलणे थांबविले नाही.

आम्ही ३२७ संस्थांना नोटिसा बजावल्या आहेत. कचऱ्याची विल्हेवाट लावण्याची व्यवस्था न करणाऱ्या संस्थांचा कचरा उचलणे बंद करण्याची कार्यवाही दिवाळीनंतर करणार आहोत.
- ज्ञानेश्‍वर मोळक, प्रमुख, महापालिका घनकचरा विभाग