महापालिका दवाखान्यांत सोनोग्राफी मशीन देणार
आरोग्यवर्धिनी केंद्रांसाठी तीन ठिकाणी पोर्टाकेबिन

सकाळ वृत्तसेवा
सोलापूर, ता. २३ : महापालिकेच्या प्रसूतिगृहांमध्ये सोनोग्राफीची सुविधा नसल्याने गर्भवती महिलांना तपासणीसाठी खासगी दवाखान्यांचा आधार घ्यावा लागत आहे. नागरिकांची गैरसोय दूर करण्यासाठी तातडीने सोनोग्राफी व कलर डॉप्लर मशीन खरेदीचा प्रस्ताव सादर करण्याच्या सूचना महापौर विनायक कोंड्याल यांनी दिल्या.
महापालिकेच्या प्रसूतिगृहांमध्ये सध्या सोनोग्राफी मशीन उपलब्ध नाही. तसेच डफरीन व दाराशा प्रसूतिगृहांत कलर सोनोग्राफीची सुविधाही नसल्याची बाब नगरसेवकांनी प्रशासनाच्या निदर्शनास आणून दिली. आर्थिक परिस्थिती नसतानाही गर्भवती महिलांना खासगी दवाखान्यात तपासणीसाठी जावे लागत असल्याने त्यांच्यावर आर्थिक भार पडत असल्याचे नगरसेवकांनी सांगितले.
याबाबत आरोग्य अधिकारी डॉ. राखी माने यांच्याकडून माहिती घेऊन सोनोग्राफी व कलर डॉप्लर मशीन खरेदीचा प्रस्ताव तातडीने सादर करण्याच्या सूचना देण्यात आल्या. प्रस्ताव आल्यानंतर आवश्यक निधीची तरतूद केली जाईल, असे महापौर कोंड्याल यांनी सांगितले.
दरम्यान, पंधराव्या वित्त आयोगांतर्गत मंजूर आरोग्यवर्धिनी केंद्रांसाठी पूर्वनिश्चित जागांवर तांत्रिक कारणांमुळे पोर्टाकेबिन उभारणे शक्य नसल्याने चंद्रकला नगर, सितारा चौक व नई जिंदगी येथे पोर्टाकेबिनद्वारे केंद्रे उभारण्यात येणार आहेत. त्यामुळे या परिसरातील नागरिकांना प्राथमिक आरोग्यसेवा उपलब्ध होण्यास मदत होणार आहे.