पिरंगुट  - "पर्यावरण संरक्षणाची जाणीव ठेऊन देशाचा शाश्वत व संधारणीय विकास साधला पाहिजे. मनुष्याने औद्योगिक क्रांतीपासून खूप मोठ्या प्रमाणात विकास केला पण त्याचबरोबर पर्यावरणाची अपरिमित व न भरून येणारी हानी केली व या सर्वांसाठी आपण अभियंतेही जबाबदार आहोत. त्यामुळे आता जो विकास साधायचा आहे तो पर्यावरणाचा कमीत कमी ऱ्हास होईल अशा पद्धतींचाच अवलंब करून करावा. "असे आवाहन भारती विद्यापीठ इन्स्टीटयूट ऑफ एन्व्हायरमेंटल एज्युकेशन आणि रिसर्चचे संचालक डॉ. एरिक भरुचा यांनी केले. 

लवळे (ता.मुळशी) येथील भारती विद्यापीठ अभियांत्रिकी महाविद्यालयात 'पर्यावरण संरक्षणासाठी संधारणीय विकास व घनकचरा व्यवस्थापन' व्याख्यानाचे आयोजन करण्यात आले होते. सावित्रीबाई फुले पुणे विद्यापीठाच्या मार्गदर्शनाखाली  आयोजित केलेल्या या कार्यक्रमात प्रमुख पाहुणे म्हणून डॉ. भरुचा बोलत होते. 

यावेळी पुणे महानगरपालिकेच्या पर्यावरण विभागाचे अधिकारी मंगेश दिघे, महाविद्यालायाचे प्राचार्य डॉ. आर. एन. पाटील उपस्थित होते. 

मंगेश दिघे यांनी पुणे शहराला भेडसावणाऱ्या पर्यावरणाच्या विविध समस्यांना महानगरपालिका कोणत्या पध्दतीने तोंड देत असते यांची जाणीव करून या विषयीचे मार्गदर्शन केले. प्रास्ताविक महाविद्यालयाचे विद्यार्थी विकास अधिकारी प्रा. अविनाश इंगोले यांनी केले. प्रा.संकेत पवार व प्रा. प्रमोद साळुंखे यांनी नियोजन केले. सूत्रसंचालन श्वेताली भागवत या विद्यार्थिनीने केले.