पुणे - पुणे महापालिकेच्या विकास आराखड्यातील (डीपी) मैदानाचे आरक्षण उठवून ही जागा पुणे जिल्हा सहकारी दूध उत्पादक संघाच्या (कात्रज डेअरी) वापरासाठी देण्याचा निर्णय घेतल्यानंतर त्यास विरोध होत असताना त्यावर दूध संघातर्फे स्पष्टीकरण देण्यात आले आहे. ही जागा पूर्वीपासून कात्रज डेअरीचीच आहे.

या ठिकाणी डेअरीच्या विस्तारीकरणाचा प्रकल्प प्रस्तावित असल्याने ही जागा आवश्‍यक असल्याने विकास आराखड्यात बदल केला जात आहे. आम्ही कायमच पुण्याच्या विकासासाठी सहकार्य केले आहे. सातारा रस्ता व कात्रज चौक ते मैत्री चौक या दरम्यान रस्ता रुंदीकरणासाठी ४ एकर जागा दिली आहे असे दूध संघातर्फे स्पष्ट करण्यात आले आहे.

पुणे महापालिकेचा डीपी करताना २०१५ मध्ये कात्रज डेअरीच्या जागेवर खेळाच्या मैदानाचे आरक्षण टाकण्यात आले होते. त्यावेळी महापालिका आयुक्त, नगररचना संचालक, नगरअभियंता यांच्या त्रिसदस्यीय समितीने हे आरक्षण काढून टाकून हा भाग निवासी केला होता. मात्र, २०१६ च्या सुधारित विकास आराखड्यामध्ये महापालिकेने पुन्हा खेळाच्या मैदानाचे आरक्षण टाकले.

तसेच या जागेतून १२ मिटर ऐवजी २४ मीटरचा रस्ता प्रस्तावित केला. या जागेत डेअरीचे विस्तारीकरण करण्याचे नियोजन आहे. त्यासाठी ७४ कोटी रुपयांचा खर्च येणार आहे. पण मैदानाच्या आरक्षणामुळे या कामात अडथळा निर्माण झाला असल्याने शासन व महापालिकेकडे पाठपुरावा करून हे आरक्षण उठविण्यासाठी कार्यवाही केलेली आहे.

शासनाकडून दूध संघास जागा

राज्य शासनाने १९६९ मध्ये ही जागा दूध संघास दुग्धजन्य पदार्थ उत्पादन व निर्मितीसाठी दिलेली आहे. २०१३ मध्ये जिल्हाधिकाऱ्यांनी ही जागा दूध संघाच्या नावाने केली. या जागेत प्रशासकीय इमारत, उत्पादन प्रक्रिया प्लांट, सर्व्हीसेस ब्लॉक इमारत, खरेदी व स्टोअर इमारत, प्रशिक्षण केंद्र कामगार वसाहत, गोठा आदीचा समावेश आहे, असे दूध संघातर्फे सांगण्यात आले आहे.