पुणे : पुणे शहर व जिल्ह्यातील तृतीयपंथियांसाठी येत्या रविवारपासून (ता. २७) आठवडाभर विशेष मतदार नोंदणी मोहिम राबविण्यात येणार आहे. आंतरराष्ट्रीय तृतीयपंथीय ओळख दिनानिमित्त या खास मोहिमेचे आयोजन करण्यात आले आहे. यानुसार २७ मार्च ते २ एप्रिल २०२२ या कालावधीत या विशेष मोहिमेची अंमलबजावणी केली जाणार आहे.

या विशेष नोंदणी मोहिमेत पुणे जिल्ह्यातील २१ विधानसभा मतदारसंघात तृतीयपंथियांची मतदार नोंदणी केली जाणार असल्याचे जिल्हाधिकारी डॉ. राजेश देशमुख यांनी सांगितले.दरवर्षी ३१ मार्च हा दिवस जागतिक तृतीयपंथी ओळख दिन म्हणून साजरा करण्यात येतो. यानिमित्ताने तृतीय पंथीयांची मतदार नोंदणी करताना त्यांच्याकडील कागदपत्रांची कमतरता लक्षात घेऊन निवडणूक आयोगाने त्यांना कागदपत्रांबाबत सवलत दिली आहे.

यानुसार १८ ते २१ या वयोगटातील तृतीयपंथी नागरिकांकडे वयाचा पुरावा नसल्यास त्यांना गुरू माँ ने दिलेले प्रमाणपत्र पुरावा म्हणून ग्राह्य धरण्यात येणार आहे. तसेच २१ वर्षावरील तृतीयपंथी व्यक्तीने स्वत:चे वय सांगणारे दिलेले प्रमाणपत्र पुरावा म्हणून ग्राह्य धरण्यात येणार असल्याचेही जिल्हाधिकारी डॉ. देशमुख यांनी सांगितले.