पुणे - जिल्ह्यातील माध्यमिक व उच्च माध्यमिक शाळांमधील दहावी, बारावीच्या निकालाची टक्केवारी सुधारण्यासाठी जिल्हा परिषदेच्या वतीने वार्षिक परीक्षेसाठी ७५ दिवसांचा निकालवृद्धी कार्यक्रम राबविण्यात आला. मात्र हा कार्यक्रम राबवूनही २३ शाळांचा निकाल हा पुन्हा एकदा ८० टक्क्यांपेक्षा कमीच लागला आहे.

निकाल कमी लागलेल्या या शाळांना जिल्हा परिषदेचे मुख्य कार्यकारी अधिकारी आयुष प्रसाद यांनी नोटिसा पाठविण्याचा आदेश मंगळवारी (ता.२०) माध्यमिक शिक्षण विभागाला दिला आहे. यानुसार आपले अनुदान बंद का करू नये, अशी विचारणा या नोटिशीद्वारे या शाळांना केली जाणार असल्याचे आयुष प्रसाद यांनी सांगितले.

जिल्हा परिषदेच्या वतीने दहावी, बारावीच्या निकालात सुधारणा करण्यासाठी राबविण्यात आलेल्या निकालवृद्धी कार्यक्रमाचा गुणवत्तेत कच्च्या असलेल्या ५२ शाळांना फायदा झाला आहे. या शाळांचा निकाल पूर्वी ८० टक्क्यांहून कमी लागत असे. त्यात आता मोठी सुधारणा होऊन, या शाळांचा निकाल हा ८० टक्क्यांहून अधिक लागला असल्याचे प्रसाद यांनी यावेळी स्पष्ट केले.

पुणे जिल्ह्यातील ७९ माध्यमिक व उच्च माध्यमिक शाळा या दहावी, बारावीच्या निकालाच्या टक्केवारीत कायम ८० टक्क्यांच्या आत राहत असत. यापैकी ४ शाळा बंद झाल्या आहेत. उर्वरित ७५ शाळांची गुणवत्ता सुधारण्यासाठी निकालवृद्धी कार्यक्रम राबविण्यात आला. यामध्ये निकाल कमी लागण्याची कारणे शोधून, त्यावर उपाय सुचविण्यात आले होते.

दरम्यान, यंदाही जिल्हा परिषद ही दहावी, बारावीचा निकाल सुधारण्यासाठी प्रयत्न करणार आहे. किमान चालू शैक्षणिक वर्षात तरी या शाळांनी सुधारणा करणे गरजेचे आहे. यासाठी या शाळांमधील शिक्षकांना विशेष प्रशिक्षण दिले जाणार आहे.