पुणे : विद्या संस्था आणि बॉश ग्लोबल सॉफ्टवेअर टेक्नॉलॉजीतर्फे येरवडा येथील सरकारी बाल सुधारगृह येथे उभारलेल्या अत्याधुनिक डिजिटल साक्षरता लॅबचे उद्‍घाटन टेक्नॉलॉजीचे पुणे केंद्रप्रमुख आदित्य अडवी यांच्या हस्ते झाले. या वेळी विद्यार्थ्यांनी विविध गुणदर्शनाचा कार्यक्रम सादर केला.

या वेळी टेक्नॉलॉजीचे प्रमुख पदाधिकारी रमेश पलानीप्पन, दीपक सिंग, आकांक्षा तिवारी, बेला शर्मा, मीनाक्षी रॉय, नीता प्रधान, रितिका बजाज, बाल न्याय मंडळाच्या सदस्या के. टी. थोरात, मेहाला नागराज आदी उपस्थित होते. कार्यक्रमामध्ये प्रकल्प परिचय, विद्यार्थी स्किट्स, डिजिटल कौशल्ये प्रात्यक्षिके झाली. विद्या वेस्ट झोनच्या मुख्य कार्यकारी अधिकारी प्रमुख प्रियांका माथूर यांनी मार्गदर्शन केले.

अडवी म्हणाले, ‘‘मुलांना त्यांच्याशी सुसंगत असा व्यवसाय देऊन त्यांना सक्षम बनविण्याचे हे एक मोठे पाऊल आहे. डिजिटल साक्षरतेद्वारे त्यांना येथे नकारात्मक प्रभावापासून दूर जाण्याची आणि त्यांच्या कुटुंबासाठी, समाजासाठी आणि देशासाठी सकारात्मक योगदान देण्याची संधी त्यांना मिळावी.’’

बाल सुधारगृहाचे अधीक्षक दत्तात्रय कुटे यांनी या उपक्रमाबद्दल कृतज्ञता व्यक्त केली. विद्या इंडियाच्या संस्थापक-अध्यक्षा रश्मी मिश्रा व डॉ. विद्या संस्थेच्या पश्चिम विभागाचे उपाध्यक्ष डॉ. नयन दाभोलकर यांनी कार्यक्रमाला शुभेच्छा दिल्या.