कात्रज : सातारा रस्त्यावर जनावरांच्या कळपाचा वावर नित्याचाच झाला आहे. हा रस्ता रहदारीचा असून यामुळे वाहतूक कोंडीत भर पडत आहे. भटक्या जनावरांचा कळप अनेकदा रस्त्यांच्या मधोमध ठाण मांडून बसलेला दिसतो. आधीच रस्ता अरूंद त्यात त्यामुळे अपघातांचा धोका वाढला आहे. महापालिकेच्या कोंडवाडा विभागाचे याकडे सरासर दूर्लक्ष होत असून वाहतूक कोंडीने वाहतूकदारांची डोकेदुखी वाढली आहे.

मोकाट जनावरांच्या मालकांना कोणाचीही भीती राहिलेली नसून त्यांचा बंदोबस्त करण्यात महापालिकेचे अधिकारी-कर्मचारी जाणीवपूर्वक दुर्लक्ष करत असल्याचे नागरिक सांगतात. परंतु, महापालिकेने दुर्लक्ष केल्याचे परिणाम पादचारी, वाहनचालकांवर होत असून त्यांना होणाऱ्या दुष्परिणामांना सामोरे जावे लागत आहे. तसेच, कात्रज भारत पेट्रोलपंप शेजारी अनेक महिन्यांपासून पावसाचे पाणी साचत आहे. त्यामुळे ते डासांच्या उत्पत्तीचे ठिकाण बनले असून नागरिकांच्या आरोग्यास घातक ठरत आहे.

कात्रज ते गुजरवाडी फाट्यापर्यंत रस्त्याच्या दुतर्फा घाणीचे आणि राडारोड्याचे साम्राज्य झाले असून याकडेही महापालिका प्रशासनाचे दुर्लक्ष होत आहे. त्यामुळे शहराच्या दक्षिण प्रवेशद्वारावर घाणीचे साम्राज्य असल्याचे चित्र आहे. याठिकाणी असलेल्या कचऱ्याभोवती डुकरांचाही सुळसुळाट झाला असून महापालिकेने भटक्या जनावरांसोबत डुकरांचाही बंदोबस्त करून परिसर स्वच्छ करण्याची मागणी नागरिकांतून होत आहे.

"सध्या पावसाळ्याचे दिवस असून येथील कचरा तसेच राडारोड्यामुळे पावसाचे पाणी अनेक दिवस साठून राहिल्यामुळे आरोग्याचा प्रश्न उभा राहतो. जनावरांकडून अचानक हल्ला झाल्यास जबाबदार कोण? अशा भटक्या जनावरांच्या विरोधात कारवाई करण्यात महापालिकेकडून दूर्लक्ष होत आहे."

- आदित्य कैलास गायकवाड, नागरिक.

"कात्रज परिसरात सातत्याने कारवाई होत असते. मागील काही दिवसांत अनेकवेळा कारवाई करण्यात आली आहे. सातारा रस्त्यांवरील मोकाट जनावरांचाही शोध घेऊन कारवाई करण्यात येईल."

- मारुती हनमघर, आरोग्य निरिक्षक, कोंडवाडा विभाग, महापालिका.