पुणे : वाहतुकीच्या नियमांचे उल्लंघन करणाऱ्यांवर कारवाई करणाऱ्या वाहतूक शाखेच्या पोलिस अधिकारी व कर्मचाऱ्यांशी वाहनचालकांकडून हुज्जत घालण्यापासून मारहाण करण्यापर्यंतच्या प्रकारात वाढ होत आहे. दर दिवशी पोलिसांबरोबरील वादाच्या घटना शहरात घडत आहेत. परंतु आता अरेरावी करणाऱ्या वाहनचालकांवर कडक कारवाई करण्याचा इशारा वाहतूक शाखेच्या पोलिस उपायुक्त तेजस्वी सातपुते यांनी दिला आहे. 

वाहतूक शाखेकडून वाहतुकीच्या नियमांचे उल्लंघन करणाऱ्यांविरुद्ध मागील काही महिन्यांपासून जोरदार कारवाई करण्यात येत आहे. त्यामुळे वाहतूक शाखेच्या पोलिस अधिकारी व कर्मचाऱ्यांबरोबर वाहनचालकांचे दररोज वादविवाद होत आहे. अनेकदा हे वाद जीवघेण्या हल्ल्यापर्यंत जात असल्याची सद्यस्थिती आहे. 

सातपुते म्हणाल्या, "नियमभंग केल्यामुळे कारवाई केली जाते. असे असताना काही वाहनचालक पोलिसांशी हुज्जत घालतात. शिवीगाळ करण्यापासून ते जीवघेणा हल्लाही केला जातो. अशा वाहनचालकांची कदापी गय केली जाणार नाही. त्यांच्याविरुद्ध पोलिस ठाण्यांमध्ये गुन्हे दाखल करून कडक कायदेशीर कारवाईचे आदेश दिले आहेत. आता बॉडी कॅमेऱ्यामुळे संबंधित वाहनचालकाविरुद्ध कारवाई करण्यास चांगली मदत होईल.''