मांजरी खुर्द (पुणे) : मागील आठ दिवसात मांजरी खुर्द (ता. हवेली) गावात तीन कोरोना बाधित रुग्ण सापडले आहेत. त्यामुळे 21 मे पर्यंत गाव शंभर टक्के बंद ठेवण्याचा निर्णय ग्रामपंचायत प्रशासनाने घेतला आहे. दरम्यान, गावामध्ये कोरोना वॉरिअर्स स्वयंसेवकांची टीम स्थापन करण्यात आली आहे. त्यांच्यामार्फत दररोज सकाळी 9 ते 11 अशी दोन तास नागरिकांना घरपोच सेवा पुरविण्यात येत आहे. 

आणखी वाचा-पुण्यात बघता बघता येरवडा परिसर बनला कंटेन्मेंट झोन

गावात एका महिला डॉक्‍टरसह तिघे जण कोरोना बाधित रुग्ण आहेत. त्यापैकी एक सत्तर वर्षीय रुग्णाचा मृत्यू झाला आहे. या रुग्णांशी संबंधित चाळीस जणांना होम क्वारंटाईन करण्यात आले आहे. त्यामुळे हे गाव प्रतिबंधित क्षेत्र म्हणून यापूर्वीच जाहीर करण्यात आले आहे.

मात्र, ग्रामस्थांकडून हा नियम पायदळी तुडवला जात आहे. त्यामुळे ग्रामपंचायत प्रशासनाने गावात प्रस्थान व प्रवेश बंदी बरोबरच ग्रामस्थांना खरेदी विक्रीसह विनाकारण बाहेर पडण्यास प्रतिबंध करण्यात आला असल्याचे सरपंच प्रतिमा उंद्रे यांनी सांगितले. 

आणखी वाचा- पुण्याच्या सुपर आजीबाईंना, कोरोनाला हरवले

नागरिकांना आवश्‍यक साहित्याची मागणी करण्यासाठी गावातील सर्व दुकानांची नावे व संपर्क नंबर तसेच त्यांच्या प्रभागात नेमलेल्या स्वयंसेवकांची माहिती घरोघर पोहोचविण्यात आली आहे. गावात एकूण पाच प्रभाग असून प्रत्येक प्रभागासाठी एक प्रमुख नेमण्यात आला आहे. 

पुण्याच्या इतर बातम्या वाचण्यासाठी येथे- क्लिक करा

या प्रत्येक प्रमुखांसह चार ते अकरा पर्यंत स्वयंसेवक निवडण्यात आलेले आहेत. नागरिकांनी दुकानदारांना दिलेल्या ऑर्डरनुसार स्वयंसेवक हा माल संबंधित घरी पोचवत आहेत.