पिंपरी - जीवनाची पुढील दिशा ठरविण्यासाठी दहावीची परीक्षा महत्त्वाची असते. त्यासाठी योग्य नियोजन करून अभ्यास करणे गरजेचे असते. अशा वेळी मुले व पालकही संभ्रमात असतात. ही गरज ओळखून ‘सकाळ’ व ‘लर्निंग लेन्स ॲकॅडमी’च्या वतीने पिंपरी-चिंचवड येथे रविवारी (ता. १७) चर्चासत्रांचे आयोजन केले आहे. हे चर्चासत्र शाहूनगर व मासुळकर कॉलनी येथे होणार आहेत. 

या चर्चासत्रांत बदललेल्या अभ्यासक्रमानुसार प्रश्‍नपत्रिकांचे स्वरूप, त्यानुषंगाने परीक्षेचा अभ्यास याविषयीच्या टिप्स दिल्या जातील. शैक्षणिक क्षेत्रातील बदलांविषयी सखोल माहिती पालक व विद्यार्थ्यांना मिळेल. बौद्धिक व मानसिक ताण न घेता अशा परीक्षांसाठी मुलांनी कशा पद्धतीने तयारी करावी तसेच अपुऱ्या माहितीमुळे पालकांना पाल्यासाठी कोणते करिअर योग्य आहे, हे नेमके कळत नाही. अशा प्रश्‍नांचे निरसन चर्चासत्रांतून होणार आहे. दहावीनंतर मेडिकल व इंजिनिअरिंग याव्यतिरिक्त उपलब्ध करिअरचे पर्याय, त्यांच्या प्रवेश परीक्षा, विद्यार्थ्यांचा कल पाहून योग्य पर्यायांची निवड कशी करावी, याविषयी करिअर मार्गदर्शक इम्रान शेख व विनीत सुतार हे सखोल मार्गदर्शन व समुपदेशन करणार आहेत. त्याचबरोबर आठवी ते दहावीच्या विद्यार्थ्यांसाठी न्यू एज्युकेशन प्लॅन २०२० विषयक माहिती या चर्चासत्रांतून मिळणार आहे.