हडपसर : महानगरपालिकेच्या येथील महात्मा फुले माध्यमिक विद्यालयातील विद्यार्थिनी कु. प्रतीक्षा दयानंद चौधरी हिने अमृतसर (पंजाब) येथे झालेल्या राष्ट्रीय कराटे स्पर्धेत सुवर्ण पदक पटकावले आहे. भारत सरकारच्या नीती आयोग अंतर्गत युथ इंडिया स्पोर्ट डेव्हलपमेंट असोसिएशनच्या वतीने "ऑल इंडिया नॅशनल कराटे कॅम्पयनशिप सन २०२२' ही स्पर्धा आयोजित कली होती.देशातील तेरा राज्यातील तेरा संघातून सुमारे २००० खेळाडू या स्पर्धेत सहभागी झाले होते. चौदा ते सोळा वयोगटातील स्पर्धेत कु. प्रतिक्षाने सुवर्ण पदक पटकावले आहे. ती संदीप नाना तुपे स्पोर्ट क्लबमधून कराटे प्रशिक्षण घेत आहे.

या स्पर्धेत मिळवलेल्या यशामुळे प्रतिक्षाचे कौतुक होत आहे. पुढे संधी मिळाल्यास आंतरराष्ट्रीय स्तरावर खेळण्याचे तीचे स्वप्न आहे. प्रतिकूल परिस्थितीतही ध्येयवादी मानसिकता ठेवून काही करण्याचे ठरविले तर मार्ग निघत जातो. प्रामाणिकपणे केलेला सराव, सरावासाठी मिळालेले मार्गदर्शन, शाळा व आईवडिलांकडून मिळालेले प्रोत्साहन यामुळे हे यश प्राप्त झाले असल्याची भावना प्रतिक्षाने व्यक्त केली. शाळाप्रमुख संजय भोईटे, वर्गशिक्षिका दीपाली ठोंबरे, शिक्षक व शिक्षकेतर सेवकांनी प्रतिक्षाचे अभिनंदन केले.