सोमाटणे, ता. ३१ ः आकुर्डीतील डॉ. डी. वाय. पाटील महाविद्यालयाच्या विद्यार्थ्यांना घोरावडेश्वर डोंगरावर पाच वर्षांपूर्वी लावलेल्या सर्व २०२ वृक्षांचे संगोपन करण्यात यश आले आहे. विद्यार्थ्यांच्या पुढाकाराने आणि देवस्थानच्या सहकार्याने ओसाड माळरानावर करण्यात आलेली वृक्षलागवड आता हिरवाईने बहरली आहे.
महाविद्यालयाच्या विद्यार्थ्यांनी १७ फेब्रुवारी २०२१ रोजी पहिल्या टप्प्यात घोरावडेश्वर मंदिर परिसरातील पुजारी व भक्तनिवासाजवळील माळरानावर अंजन, रुद्राक्ष व बेलवन या जातींचे १०१ वृक्ष लावले होते. त्यानंतर ७ मार्च २०२१ रोजी दुसऱ्या टप्प्यात देवचाफा जातीचे आणखी १०१ वृक्ष लावण्यात आले.
वृक्षलागवडीनंतर त्यांचे संरक्षण व्हावे, तसेच उन्हाळ्यात नियमित पाणी मिळावे, यासाठी देवस्थान व महाविद्यालयाच्या संयुक्त विद्यमाने जाळीचे कुंपण आणि ठिबक सिंचनाची व्यवस्था करण्यात आली. नजीकच्या काळात देवस्थानच्या वतीने अमरनाथ बाबा व त्यांच्या सहकाऱ्यांनी या वृक्षांची नियमित देखभाल केली. त्यामुळे सर्व २०२ वृक्ष जगले असून, त्यांची वाढही चांगली झाली आहे. सध्या या वृक्षांची उंची आठ ते दहा फुटांपेक्षा अधिक झाली आहे. सर्वच्या सर्व वृक्ष जगवण्यात यश आल्याने काही वर्षांपूर्वी उजाड दिसणारे माळरान आता हिरव्यागार वृक्षांनी बहरले आहे.

PNE26W46075
---