पुणे : मराठी नाट्यसृष्टीत 'नाट्यदर्पण पुरस्कार' (Natyadarpan Award) सुरू करणारे नाट्यदर्पण प्रतिष्ठानचे संस्थापक सुधीर श्रीकृष्ण दामले (Sudhir Damle) यांचे शनिवारी (ता. ८) रोजी निधन झाले. ते ८२ वर्षांचे होते. त्यांनी १९७५ साली गणेश सोळंकी यांच्या सल्ल्याने आणि इतर सहकाऱ्यांच्या मदतीने नाट्यदर्पण पुरस्कार सुरू केले. ते वितरीत करण्यासाठी 'नाट्यदर्पण रजनी'चे आयोजन ते करत.

मराठी नाट्यसृष्टीमध्ये या पुरस्काराचे महत्त्व वादातीत होते. नाट्यसंगीत आणि चित्रपट सृष्टीतील कलाकार या पुरस्कार सोहळ्यात हजेरी लावत. २५ वर्षे सातत्याने या रजनीचे गारुड संपूर्ण नाट्यसृष्टीवर होते. रसिकांच्या मनांमध्ये हे प्रेम आणि औत्सुक्य शिखरावर आहे, अशा वेळीच १९९९ साली २५ वी नाट्यदर्पण रजनी झाल्यावर या उपक्रमाची त्यांनी सांगता केली.

या पुरस्कार सोहळ्याच्या बरोबरीने 'नाट्यदर्पण विशेषांक' आणि 'कल्पना एक -आविष्कार अनेक' ही लोकप्रिय एकांकिका आणि उपक्रम नाट्यदर्पण प्रतिष्ठानतर्फे २० वर्षे त्यांनी चालविले.