नाशिक, ता. २१ : साखरेच्‍या दरांचा आलेख उंचावत चालला आहे. गेल्‍या दोन दिवसांत प्रतिकिलो १५ रुपयांनी दरवाढ झाली असून, सद्यःस्‍थितीत किरकोळ बाजारात साखर ७२ ते ७५ रुपये प्रतिकिलोने विक्री होत आहे. साखरेपाठोपाठ गुळाच्‍या किमतीमध्येही लक्षणीय वाढ झाली असल्‍याने एरवी सर्वसामान्‍यांचे तोंड गोड करणारे हे पदार्थ आता ‘कडू’ वाटू लागले आहेत.
साखरेच्‍या दरांमध्ये गेल्‍या पंधरा दिवसांमध्ये मोठी वाढ झाली आहे. एरवी बाजारपेठेत ३८ ते ४० रुपये प्रतिकिलो मिळणारी साखर काही दिवसांपूर्वी थेट ६० रुपयांवर पोचली होती. केवळ राज्‍यातच नव्‍हे तर देशात मागणीच्‍या तुलनेत पुरवठा कमी असल्‍याने, ही दरवाढ झाल्‍याचे व्‍यावसायिकांचे म्‍हणणे आहे. तसेच नवीन हंगामातील साखर येण्यासाठी डिसेंबर उजाडणार असल्‍याने ऐन सण- उत्‍सवांच्‍या काळात साखर कडवट होत चालली आहे. पुढील काही महिने साखरेचे दर चढेच राहण्याचा अंदाज व्‍यावसायिकांनी वर्तविला आहे.