सुपे, ता. ३ ः ऊस गाळपानंतर उरणाऱ्या बगॅसपासून वाफ निर्मिती करून टर्बाइनच्या सहायाने विद्युत निर्मिती कशी केली जाते याची माहिती विद्या प्रतिष्ठानच्या सुपे (ता. बारामती) येथील सुपे महाविद्यालयाच्या विद्यार्थ्यांनी घेतली.
महाविद्यालयाच्या संगणकशास्त्र विभागातील द्वितीय वर्षाच्या विद्यार्थ्यांनी सोमेश्वर सहकारी साखर कारखान्यास नुकतीच भेट देऊन माहिती घेतली. अभ्यासक्रमातील सैद्धांतिक ज्ञानाबरोबरच औद्योगिक प्रक्रियेची थेट माहिती विद्यार्थ्यांना होण्यासाठी या औद्योगिक भेटीचा उपक्रम राबवल्याची माहिती प्राचार्य डॉ. संजय काळे, प्रा. निकिता गाडेकर यांनी दिली.
या भेटीत वितरण नियंत्रण प्रणालीच्या माध्यमातून एकूणच प्रकल्पाचे नियंत्रण कसे केले जाते. याचे प्रात्यक्षिक विद्यार्थ्यांना पहायला मिळाले. येथील उपकरणशास्त्र अभियंता अभय चव्हाण, डीसीएस नियंत्रक समीर यादव यांनी विद्यार्थ्यांना मार्गदर्शन केले. दरम्यान साखर निर्मितीची प्रक्रिया विद्यार्थ्यांनी प्रत्यक्ष पाहिली.