सासवड, ता. ४ : सासवड (ता. पुरंदर) येथील उदयोन्मुख खेळाडू स्वरा योगेश इनामके हिची मालदीव येथे होणाऱ्या आंतरराष्ट्रीय बॉल बॅडमिंटन स्पर्धेसाठी भारतीय संघात निवड झाली आहे. या निवडीमुळे सासवडसह संपूर्ण पुणे जिल्ह्याच्या शिरपेचात मानाचा तुरा रोवला गेला आहे.
​स्वराने सातवीपासून सासवडच्या म. ए. सो. वाघिरे विद्यालयातून खेळाला सुरुवात केली. तिला हिरामण सहारे, संजय महाजन आणि मयूर जांभळे यांचे मार्गदर्शन लाभले. आतापर्यंत तीनवेळा राष्ट्रीय स्तरावर सहभाग नोंदवणाऱ्या स्वराला दोन वेळा ‘बेस्ट अपकमिंग प्लेयर’ पुरस्काराने गौरविण्यात आले आहे. स्वरा सध्या वाघिरे विद्यालयात १० वीत शिकत असून सासवड बॉल बॅडमिंटन क्लबमध्ये सराव करते.
तिने आपल्या यशाचे श्रेय प्रशिक्षक, कुटुंब आणि महाराष्ट्र बॉल बॅडमिंटन संघटनेचे सचिव अतुल इंगळे तसेच पुणे जिल्हा बॉल बॅडमिंटन संघटनेच्या पदाधिकाऱ्यांना दिले आहे. स्वराच्या या यशामुळे तिच्यावर सर्व स्तरांतून अभिनंदनाचा वर्षाव होत आहे.