आपटाळे : जुन्नर तालुक्याच्या राजकीय वर्तुळाचे लक्ष लागलेल्या पाडळी बारव ग्रामपंचायतीच्या लोकनियुक्त सरपंच पदाच्या चौरंगी लढतीत पाडळी बारव ग्रामविकास पॅनेलच्या स्वाती सोपान कबाडी यांनी बाजी मारली. स्वाती कबाडी यांना 1151 मते मिळाली तर प्रतिस्पर्धी शिवनेरी ग्रामविकास पॅनेलच्या उमेदवार सोनाली सतीश लोखंडे यांना 928 मते,

शिवाई देवी ग्रामविकास पॅनेलच्या उमेदवार क्रांती मल्हारी चव्हाण यांना 492 मते तर श्री हनुमान ग्रामविकास पॅनेलच्या उमेदवार रेखा नवनाथ कबाडी यांना 225 मते मिळाली. तब्बल बावीस वर्षांनंतर पाडळी वस्तीला सरपंच पदाची संधी मिळाल्याने पाडळी ग्रामस्थांनी जल्लोष साजरा केला.

पाडळी बारव ग्रामपंचायतीच्या वार्ड क्रमांक दोन मधून जितेंद्र तालेवार कबाडी, अश्विनी गणेश कबाडी व वसुधा राजू कबाडी यांची बिनविरोध निवड झाली होती. उर्वरित सदस्य पदाच्या बारा जागासाठी निवडणुक प्रक्रिया पार पडली.

बारा जागापैकी पाडळी बारव ग्रामविकास पॅनेल ला फक्त दोनच जागांवर विजय मिळवण्यात यश आले. पाडळी बारव ग्रामविकास पॅनलचे वार्ड क्रमांक एकमधून संतोष मारुती केदारी तर वार्ड क्रमांक 3 मधून ज्योती जयसिंग पापडे हे उमेदवार विजयी झाले.

पॅनेलप्रमुख असलेल्या माजी लोकनियुक्त सरपंच संतोष केदारी यांच्या बारव या भागातून या पॅनलचे एकूण तीन वार्डातून नऊ उमेदवारापैकी फक्त एकच उमेदवार निवडून आला आहे. माजी लोकनियुक्त सरपंच संतोष केदारी व माजी सरपंच ज्ञानेश्वर कबाडी यांनी पाडळी बारव ग्रामविकास पॅनलचे नेतृत्व केले.

शिवनेरी ग्रामविकास पॅनेलने बारा पैकी नऊ जागांवर निवडणूक लढवली. नऊ पैकी सहा जागांवर शिवनेरी ग्रामविकास पॅनलचे उमेदवार विजयी झाले. वार्ड क्रमांक एक मधून मनीषा अनंत रेंगडे, वार्ड क्रमांक चार मधून संजय गोविंदसिंह राजपूत,

शीतल विनायक कळंबे, जिजाबाई शांताराम रेंगडे तर वार्ड क्रमांक पाच मधून आदिती बाळासाहेब सदाकाळ व सय्यद नेमतअली फजल हुसेन हे उमेदवार विजयी झाले. या पॅनलचे नेतृत्व संजय परदेशी यांनी केले होते.

शिवाई देवी ग्रामविकास पॅनलने देखील बारा पैकी नऊ जागा लढविल्या. नऊ पैकी दोन जागांवर पॅनलचे उमेदवार विजयी झाले. त्यामध्ये वार्ड क्रमांक एक मधून मनीषा हनुमंत लोखंडे व वार्ड क्रमांक पाच मधून माजी उपसरपंच राजेश धारू कारभळ हे उमेदवार विजयी झाले.

या पॅनलचे नेतृत्व राजेश कारभळ यांनी केले होते. उपसरपंच निवडणुकीच्या वेळी राजेश कारभळ यांची भूमिका निर्णायक ठरणार असल्याची चर्चा आहे. तर श्री हनुमान ग्रामविकास पॅनेल ने तीन जागावर निवडणुक लढवली त्यापैकी दोन जागांवर विजय मिळवला. वार्ड क्रमांक तीन मधून आत्माराम ज्ञानेश्वर कबाडी, पुष्पा बाळू कडू हे उमेदवार विजयी झाले.