जुन्नर : जुन्नर (junnar) तालुक्यात पावसाळी पर्यटनास आलेल्या एक हजार २२० पर्यटकांनी सहा लाख १० हजार रुपये दंड जुन्नर पोलिसांना दिला असल्याचे पोलीस (police) निरीक्षक विकास जाधव यांनी सांगितले. गेल्या पंधरा दिवसांत ३०९ पर्यटकांकडून पोलीसांनी एक लाख ५४ हजार ५०० रुपयांचा दंड वसूल केला आहे.

स्वातंत्र्यदिनी ४० पर्यटकाकांकडून २० हजार रुपये दंड घेण्यात आला. जुलै अखेर ९११ पर्यटकांवर केलेल्या दंडात्मक कारवाईत चार लाख ५५ हजार ५०० रुपये दंड वसूल झाला आहे. पर्यटनस्थळांच्या एक किलोमीटर परिसरात प्रतिबंधात्मक आदेश लागू असल्याने ऐतिहासिक नाणेघाट, दाऱ्याघाट, जीवधन, चावंड, हडसर, शिवनेरी किल्ला, आंबे-हातवीज तसेच माणिकडोह, वडज धरण परिसरात पर्यटकांनी येऊ नये, असे वारंवार आवाहन करून देखील नाणेघाट, दाऱ्याघाट येथे येणाऱ्या पर्यटकांच्या संख्येत प्रामुख्याने विकएंड व सुट्टीच्या दिवशी वाढ होत असल्याने पोलीसांनी दंडात्मक कारवाईचा बडगा उचलला आहे. पर्यटन स्थळे खुली झाल्याचे सांगून काही उद्दाम पर्यटकांकडून या कारवाईत अडथळा आणण्याचा प्रयत्न करण्यात आला अशा अकरा पर्यटकांवर गुन्हे दाखल करण्यात आले असल्याचे जाधव यांनी सांगितले.

स्वातंत्र्य दिनाच्या निमित्ताने जोडून येत असलेल्या सुट्टयामध्ये पर्यटकांची संख्या वाढण्याची शक्यता गृहीत धरून पोलीसांनी पर्यटन स्थळी बंदोबस्त वाढविला होता. कोरोनाचा प्रसार होऊ नये तसेच पर्यटकांची सुरक्षितता अबाधित राहावी यासाठी पर्यटन स्थळांच्या एक किलोमीटर परिसरात जिल्हाधिकाऱ्यांनी प्रतिबंधात्मक आदेश लागू केले आहेत.या आदेशाची विकएंडला शनिवार , रविवार व सुट्टीच्या दिवशी अंमलबजावणी केली जात आहे. पर्यटक दंडात्मक कारवाईला सामोरे जात असल्याचे चित्र दिसून येत आहे.

पर्यटन स्थळाच्या एक किलोमीटर परिसरात पाच किंवा पाच पेक्षा अधिक लोक एकत्र येण्यास प्रतिबंध आहे तसेच धोकादायक ठिकाणी चित्रीकरण, सेल्फी काढणे यास बंदी आहे. धबधब्याचे खाली तसेच प्रवाहात जाण्यास बंदी घालण्यात आली आहे. मद्य जवळ बाळगण्यास तसेच मद्यपान करण्यास देखील बंदी आहे. सार्वजनिक ठिकाणी महिलाची छेडछाड करणाऱ्या विरुद्ध कारवाई करण्यात येत आहे.पोलीस पर्यटन स्थळांच्या मार्गावर नाकाबंदी करून तपासणी करत आहेत.