तळेगाव स्टेशन : तळेगाव-चाकण महामार्गावरील जटील वाहतूक समस्या आणि रखडलेल्या रस्ते कामाकडे राष्ट्रीय महामार्ग विभागाकडून होत असलेल्या दुर्लक्षाच्या निषेधार्थ तसेच वाहतूक नियंत्रण शाखेकडून अवजड वाहन प्रवेशबंदीची होत असलेली पायमल्ली थांबवण्यासाठी तळेगाव-चाकण महामार्ग कृती समितीकडून आज रविवारी सकाळी १० वाजता तळेगाव स्टेशनच्या मराठा क्रांती चौकात ठिय्या आंदोलन आणि आणि शोकसभेचे आयोजन करण्यात आले आहे.

तळेगाव-चाकण महामार्ग कृती समितीचे अध्यक्ष नितीन गाडे,उपाध्यक्ष दिलीप डोळस,सचिव अमित प्रभावळकर यांनी जिल्हाधिकारी, पिंपरी-चिंचवड पोलीस आयुक्त आणि पुणे ग्रामीण पोलीस अधीक्षकांना तळेगाव-चाकण महामार्गाची दुरावस्था,अपघात,वाहतुुक कोंडी आणि अवजड वाहन प्रवेशबंदीच्या अंमलबजावणीबाबत निवेदन दिले आहे.तळेगावातील अवजड वाहन प्रवेश बंदीची काटेकोर अंमलबजावणी करावी.अथवा पर्यायी मार्ग म्हणून सर्व अवजड वाहतूक तळेगाव एमआयडीसी मार्गे चाकणकडे वळवावी.

अवजड वाहन प्रवेशबंदी धाब्यावर बसवून चिरीमिरी घेऊन वाहने सोडून,अपघातांत कारणीभुत तळेगाव वाहतूक विभाग आणि वडगाव मावळ वाहतुक नियंत्रण शाखेच्या दोषी अधिकाऱ्यांवर कडक कारवाई करावी.

अस्तित्वातील तळेगाव-चााकण-शिक्रापूर राष्ट्रीय महामार्गाची दुरुस्ती करुन,सहापदरीकरणाचे काम युद्धपातळीवर सुरु करावे आदी मागण्यांसाठी हे ठिय्या आंदोलन करण्यात येत आहे.जास्तीत जास्त नागरिकांनी आंदोलनात सामील होण्याचे आवाहन करणारे फलक कृती समितीकडून वडगाव फाटा,स्टेशन चौक,मराठा क्रांती चौकासह ठिकठिकाणी लावण्यात आले आहेत.

जनसेवा विकास समिती,अण्णा हजारे प्रणीत राष्ट्रीय भ्रष्टाचार विरोधी न्यास,जय संघर्ष वाहन चालक मालक सामाजिक संस्था,जनसेवा विकास प्रतिष्ठान तळेगांव दाभाडे,तळेगांव दाभाडे शहर रिक्षा संघ,जायंट्स ग्रुप ऑफ तळेगांव दाभाडे आदींनी या आंदोलनास आपला पाठींबा जाहीर केला आहे.