पुणे : वयाच्या सहाव्या वर्षांपासून बुद्धिबळ खेळणाऱ्या तनिषाने आता बारावीच्या परीक्षेतही (12th Exam Result) शंभर टक्के गुण मिळवीत डाव जिंकला आहे. छत्रपती संभाजीनगर येथील तनिषा बोरामणीकर (Tanisha Boramanikar) हिला बारावीच्या परीक्षेत एकूण ६०० गुणांपैकी ५८२ गुण मिळाले असून तिला १८ क्रीडा गुण मिळाले आहेत. त्यामुळे या विद्यार्थिनीला बारावीच्या परीक्षेत १०० टक्के गुण मिळाले आहेत.

महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी-मार्चमध्ये घेतलेल्या बारावीच्या परीक्षेचा निकाल मंगळवारी जाहीर झाला. या परीक्षेत शंभर टक्के गुण मिळविणारी तनिषा ही राज्यातील एकमेव विद्यार्थिनी आहे. खरंतर तनिषा ही राष्ट्रीय स्तरावरील बुद्धीबळ पटू आहे. छत्रपती संभाजीनगर येथील देवगिरी महाविद्यालयातील वाणिज्य शाखेतील ही विद्यार्थिनी आहे.

तिला ऑर्गनायझेशन ऑफ कॉमर्स ॲण्ड मॅनेजमेंट, पाली आणि अर्थशास्त्र विषयात शंभरपैकी शंभर गुण आहेत. तर इंग्रजी विषयात ८९ गुण, बुक कीपिंग ॲण्ड अकाउंटन्सी विषयात ९५ गुण तर सेक्रेटरियल प्रॅक्टिस विषयात ९८ गुण आहेत. तनिषा ही बुद्धीबळ खेळाडू असून तिने सात वर्षाखालील, नऊ वर्षाखालील, ११ वर्षाखालील वयोगटासाठी झालेल्या राष्ट्रीय स्पर्धेत विविध पदके मिळविली आहेत.

ओपन नॅशनल्स आणि राज्यस्तरीय स्पर्धेत सहभाग घेतला होता. १६ वर्षाखालील वयोगटासाठी राष्ट्रीय पातळीवर झालेल्या सब ज्युनिअर बुद्धीबळ स्पर्धेत तिने ‘नॅशनल चॅम्पियन’चा मान मिळविला आहे. बुद्धिबळाच्या खेळात कामगिरी करणाऱ्या तनिषाने बारावीच्या परीक्षेतही चमकदार कामगिरी केली आहे.

तनिषाचे वडील सागर म्हणाले, ‘‘वयाच्या सहाव्या वर्षापासून तनिषा बुद्धीबळ खेळत आहे. लहानपणापासूनच तिने राष्ट्रीय स्तरावरील स्पर्धेत उल्लेखनीय कामगिरी केली आहे. अकरावीत असतानाही ती राष्ट्रीय स्पर्धेत सहभागी झाली होती. बारावीत असतानाही तिने विविध स्पर्धांमध्ये सहभाग नोंदविला आहे.’’

तनिषा सध्या सनदी लेखापाल होण्यासाठी तयारी करत आहे. तिला सनदी लेखापाल व्हायचे आहे. याशिवाय ती केंद्रीय लोकसेवा आयोगाच्या परीक्षेची देखील तयारी करणार आहे. तसेच बुद्धीबळ खेळातही तिला आणखी मोठी उंची गाठायची असल्याचे सागर यांनी ‘सकाळ’शी बोलताना सांगितले.