पुणे - धायरी येथील मुठा उजवा कालव्यातील पाणी टॅंकरमध्ये भरण्यासाठी जो वीजजोड घेतला आहे, तो शेतीसाठीचा आहे; परंतु त्याचा वापर व्यावसायिक कारणांसाठी होत असल्याचे महावितरणच्या भरारी पथकाला आढळले. 

एकीकडे शहरात पाणी टंचाईला पुणेकरांना तोंड द्यावे लागत असताना, दुसरीकडे कालव्यातील पाण्याची टॅंकर माफियांकडून सर्रास चोरी होत असल्याचा प्रकार ‘सकाळ’ने उघडकीस आणला होता. धायरी परिसरात टॅंकरचालकांकडून शेतीच्या नावाखाली कालव्यातील पाण्याची चोरी केली जात असल्याचे निदर्शनास आले होते. त्यासाठी कालव्यास भगदाड पाडून पाइपने विहिरीत पाणी आणले जाते. तेथे टॅंकरमध्ये भरून त्यांची विक्री केली जात होती.

या संदर्भातील बातम्या ‘सकाळ’मध्ये प्रसिद्ध झाल्यानंतर महावितरणच्या भरारी पथकाने तेथे तपासणी केली. त्या वेळी हा धक्कादायक प्रकार उघडकीस आला.

कालव्याला भगदाड पाडून त्यात पाइप टाकून ते पाणी विहिरीत आणण्यासाठी शेतीसाठीच्या वीजमीटरचा वापर होत असल्याचे पथकाच्या निदर्शनास आले. तसेच विहिरीतील पाणी उपसून ते टॅंकरमध्ये भरण्यासाठीदेखील त्याच मीटरमधून विजेचा वापर केला जात आहे.

हे लक्षात आल्यानंतर पथकाने किती वीजचोरी झाली असावी, यांचे मोजमाप करून संबंधितांना सुमारे एकोणीस लाख रुपयांचे वीजबिल दिले. मात्र, अद्याप संबंधितांकडून त्या वीजबिलाचा भरणा झालेला नाही. मात्र, त्यावर महावितरणकडून कोणतीही कारवाई झालेली नाही. एकीकडे एखादे जरी बिल थकले, तरी वीजजोड तोडणारे महावितरण या प्रकरणात गप्प का, असा प्रश्‍न या निमित्ताने विचारला जात आहे.

भरारी पथकाच्या कारवाईत हे प्रकार उघडकीस आले आहेत. त्यांनी या संदर्भात किती रकमेची वीजचोरी झाली, यांचे मोजमाप करून कळविले. त्यानुसार आम्ही वीजबिल संबंधितांना पाठविले आहे. ते भरण्यासाठी ७२ तासांची मुदत दिली आहे. संबंधितांनी वीजबिल न भरल्यास भरारी पथक त्यांच्यावर नियमानुसार योग्य ती कारवाई करेल.
- अजित पाटील, अतिरिक्त कार्यकारी अभियंता, धायरी विभाग, महावितरण