पुणे - पुण्यात मागील काही दिवसांपासून कोयता गँगची दहशत निर्माण कऱण्याचा प्रयत्न करण्यात येत आहे. काही दिवसापूर्वीच एका मुलीवर कोयत्याने वार करण्याचा प्रयत्न झाला होता. त्यावेळी एका विद्यार्थ्याने आपला जीव धोक्यात घालून तरुणीला वाचवलं होतं. आता पुन्हा एकदा पुण्यात कोयता गँगची दहशत दिसून आली.

पुण्यातील मध्यवर्ती भाग समजला जाणाऱ्या टिळक रोडवर एमपीएससी परीक्षेची तयारी कऱणाऱ्या तरुणावर तिघांनी कोयत्याने वार केल्याची घटना घडली आहे. याप्रकरणी विश्रामबाग पोलिसानी पानमळा परिसरातून तिघांना अटक केली. आज पहाटे ही घटना घडली होती.

या प्रकरणी विश्रामबाग पोलिस ठाण्यात या प्रकरणी खूनाचा प्रयत्न केल्याचा गुन्हा दाखल कऱण्यात आला आहे. पुण्यातील कोयता गँगचा मुद्दा विधीमंडळात देखील गाजला होता. त्यानंतर कोयत्याच्या घटनांना ब्रेक लागला होता. मात्र आता पुन्हा कोयता गँग डोक वर काढत असल्याचं समोर आलं आहे.