पुणे : पुणे रेल्वे स्थानकाचा विकास टप्प्याटप्प्याने केला जाईल. त्यामुळे प्रवाशांना अद्ययावत सेवा आणि सुविधा देण्यात येतील, असे रेल्वे मंत्री अश्विनी वैष्णव यांनी सांगितले. विकास करताना स्थानकाच्या ‘हेरिटेज’ दर्जाला धक्का लागणार नाही, अशी ग्वाही त्यांनी दिली. वैष्णव पुणे शहराच्या दौऱ्यावर आले आहेत. या वेळी त्यांनी पुणे स्थानकाची पाहणी केली. पुणे शहराची लोकसंख्या वाढत आहे. त्यामुळे या शहराच्या गरजा वाढत आहेत.

त्या दृष्टीने पुणे स्थानकाचा विकास केला जाईल. केवळ पुणे स्थानकाची क्षमता वाढवून चालणार नाही तर जवळच्या स्थानकांचाही विकास होणे गरजेचे आहे. उरुळी स्थानकाजवळ मेगा कोचिंग टर्मिनल केले जाणार आहे. त्याचा फायदा पुण्यातील प्रवाशांना होणार आहे, असेही त्यांनी सांगितले. पुणे-मुंबई दरम्यान घाट मार्गावरील तीव्र चढण कमी करण्यात येईल. त्यामुळे बँकर जोडण्याची गरज भासणार नाही, असे त्यांनी सांगितले.

रेल्वे प्रवाशांसाठी असलेल्या चादरी, उशा आदींच्या (लिनन) स्वच्छतेसाठी पुणे स्थानक प्रशासनाकडून ‘आय’ तंत्रज्ञानाचा वापर केला जातो. आता हे मॉडेल देशात पुणे मॉडेल म्हणून प्रसिद्ध होणार असल्याची माहितीही त्यांनी दिली.

या वेळी मध्य रेल्वेचे सरव्यवस्थापक राम यादव, पुणे विभागाच्या विभागीय रेल्वे व्यवस्थापक इंदू दुबे, अतिरिक्त विभागीय रेल्वे व्यवस्थापक बी. के. सिंह, वरिष्ठ विभागीय वाणिज्य व्यवस्थापक डॉ. मिलिंद हिरवे आदी वरिष्ठ अधिकारी उपस्थित होते.

मार्गिकांबाबत राज्य सरकारशी चर्चा

पुणे ते लोणावळा दरम्यान तिसऱ्या आणि चौथ्या मार्गिकांचा प्रश्न गेल्या अनेक वर्षांपासून प्रलंबित आहे. याविषयी वैष्णव म्हणाले, ‘‘या मार्गिका नक्की होतील. त्यांच्या उभारणीत राज्य सरकारचाही वाटा असतो. त्यामुळे महाराष्ट्र सरकारशी चर्चा करून निर्णय घेतला जाईल.’’