पुणे : शहरासह जिल्ह्यात आतापर्यंत एकूण १९ लाख ५८ हजार (३८ टक्के) नागरिकांचे लसीकरण करण्यात आले आहे. त्यापैकी ५ लाख ६६ हजार ८३६ (११ टक्के) नागरिकांना लसीचा दुसरा डोस मिळाला आहे.

जिल्ह्यात कोरोनाबाधित नागरिकांची संख्या तुलनेत अधिक आहे. पुणे, पिंपरी चिंचवड शहरासह जिल्ह्यातील लोकसंख्या एक कोटी १७ लाख आहे. त्यापैकी लसीकरणासाठी अपेक्षित लाभार्थ्यांची संख्या ५१ लाख ७५ हजार इतकी आहे. पुण्यात लसीचा तुटवडा निर्माण होण्यापूर्वी लसीकरणाने चांगला वेग घेतला होता. राज्यात सर्वाधिक कोल्हापूर, सांगली, पुणे आणि सातारा जिल्ह्यात सर्वाधिक लसीकरण झाले आहे. जिल्ह्यात ३८ टक्के नागरिकांना लसीचा पहिला डोस मिळाला. तर, ११ टक्के नागरिकांना दोन्ही डोस मिळाले आहेत.

ज्येष्ठांचे लसीकरण ८० टक्क्यांवर

जिल्ह्यातील ६० वर्षे वयावरील ज्येष्ठ नागरिकांचे ८० टक्के लसीकरण झाले आहे. ज्येष्ठ नागरिकांची संख्या दहा लाखांच्या जवळपास आहे. त्यापैकी ७ लाख ८० हजार ५१८ ज्येष्ठांना लसीचा पहिला डोस मिळाला. तसेच, २ लाख ६७ हजार २८२ ज्येष्ठांना दुसरा डोस देण्यात आला. तर, लशीच्या तुटवड्यामुळे १८ ते ४४ वयोगटातील केवळ ५० हजार नागरिकांना पहिला डोस मिळाला आहे.

''प्रत्यक्ष लसीकरण केंद्रांवर जाऊन आढावा घेतला. सर्व यंत्रणांनी समन्वयाने प्रयत्न केले. ज्या केंद्रांवर सुरवातीच्या कालावधीत लसीकरण जास्त झाले, त्याठिकाणी पुरेशा प्रमाणात लसीचा पुरवठा झाला. जिल्ह्यात एका दिवसात सर्वाधिक ८५ हजारपर्यंत लसीकरणाचा टप्पा गाठला आहे.''

- डॉ. राजेश देशमुख, जिल्हाधिकारी

• लसीकरण केंद्रे ६९९

• अपेक्षित लाभार्थ्यांची संख्या ५१ लाख ७४ हजार ७७१

• पहिला डोस १९ लाख ५८ हजार ६५ (३८ टक्के)

• दुसरा डोस ५ लाख ६६ हजार ८३६ (११ टक्के)

वयोगट पहिला डोस दुसरा डोस

• ६० वर्षांवरील ज्येष्ठ नागरिक ७ लाख ८० हजार ५१८ (८० टक्के) २ लाख ६७ हजार २८२ (२७ टक्के)

• ४५ ते ५९ वर्षे ८ लाख १० हजार ६०९ (४७ टक्के) १ लाख ३९ हजार २२५ (८ टक्के)

• १८ ते ४४ वर्षे ५० हजार ८३ (२ टक्के) शून्य