पुणे : तरुणाने कोयता हवेत फिरवत महाविद्यालयीन युवतींसमोर ‘स्टंटबाजी’ केल्याचा धक्कादायक प्रकार शुक्रवार पेठ परिसरातील सुभाषनगरमध्ये सोमवारी दुपारी घडला. दरम्यान, या घटनेमुळे नागरिकांमध्ये भीतीचे वातावरण निर्माण झाले होते. या प्रकरणी खडक पोलिसांनी एका तरुणाला ताब्यात घेतले आहे.

महेश सिदाप्पा भंडारी (वय २२, रा. जनता वसाहत, पर्वती) असे ताब्यात घेतलेल्या तरुणाचे नाव आहे. पोलिसांनी दिलेल्या माहितीनुसार, सुभाषनगरमधील एका महाविद्यालयातील युवती महाविद्यालयातून घरी निघाल्या होत्या. त्या वेळी दुचाकीवर आलेल्या त्यांच्या ओळखीच्या तरुणांपैकी एकजण हवेत कोयता फिरवत होता. हा प्रकार बघून युवती घाबरून निघून गेल्या. याबाबत दोघा नागरिकांनी त्याला जाब विचारला. त्या वेळी तरुणाने त्यांना दमबाजी केली.

दरम्यान, या घटनेनंतर स्थानिक नागरिकांनी संतप्त प्रतिक्रिया व्यक्त केल्या आहेत. त्यांच्या म्हणण्यानुसार, ‘सुभाषनगर भागात मुलींच्या छेडछाडीचे प्रकार सुरू असतात. आजची ही घटना बघून आमच्या अंगावर शहारा आला. या भागात दामिनी पथकासह पोलिस गस्त वाढविण्याची मागणी पोलिस आयुक्तांकडे केली होती, परंतु अद्याप कारवाई झालेली नाही. अशा घटना रोखण्यासाठी पोलिसांनी कठोर कारवाई करावी.’

या घटनेबाबत मुलींची तक्रार नाही, परंतु घटनेचे गांभीर्य लक्षात घेत हवेत कोयता फिरवणाऱ्या तरुणाविरुद्ध गुन्हा दाखल करण्यात येत आहे. अशा घटना रोखण्यासाठी पोलिस गस्त वाढविण्यात येणार आहे.

- संदीपसिंग गिल, पोलिस उपायुक्त