पुणे - 'तो' आठच दिवसांपुर्वी जंगली महाराज रस्त्यावरील एका हॉटेलमध्ये व्यवस्थापक म्हणून कामाला लागला. काही दिवस त्याने हॉटेलचे आर्थिक व्यवहार हाताळतानाच तेथील हालचालही पाहीली आणि आठ दिवसानंतर त्याने हॉटेलच्या गल्ल्यातील 22 हजार रुपयांची रोकड घेऊन पळ काढला. शिवाजीनगर पोलिसांनीही त्याला तितक्‍याच शिताफीने अवघ्या बारा तासाच्या आत अटक केली.

अजय सुरेश सक्‍सेना (रा. लिंकरोड, मुंबई, मूळ. रा. उत्तरप्रदेश) असे अटक केलेल्या व्यवस्थापाचे नाव आहे. याप्रकरणी हॉटेलची देखभाल पाहणाऱ्या व्यक्तीने फिर्याद दिली आहे. वरिष्ठ पोलिस निरीक्षक अरविंद माने यांनी दिलेल्या माहितीनुसार, जंगली महाराज रस्त्यावर "हॉटेल रिजेंट' या नावाचे हॉटेल आहे. या हॉटेलमध्ये सक्‍सेना हा आठ दिवसांपुर्वी व्यवस्थापक म्हणून कामाला लागला होता. त्यास रात्रपाळीच्या कामाची जबाबदारी देण्यात आली होती. त्यानुसार, तो दररोज ग्राहकांकडून पैसे घेऊन हॉटेलचा आर्थिक व्यवहार सांभाळत होता.

सात दिवस त्याने त्याची जबाबदारी व्यवस्थित पार पाडली. त्यानंतर 16 मे रोजी रात्री त्याने नेहमीप्रमाणे काम केले, दुसऱ्या दिवशी सकाळी गल्ल्यात जमा झालेले 22 हजार रुपये घेऊन तो पळून गेला. हा प्रकार हॉटेलची देखभाल पाहणाऱ्यांच्या लक्षात आला. त्यानुसार, त्यानी तत्काळ शिवाजीनगर पोलिस ठाण्यात फिर्याद दिली. दरम्यान, शिवाजीनगर पोलिसांनी सीसीटीव्ही चित्रीकरण तपासून त्याचा माग काढण्याचा प्रयत्न केला. त्याचवेळी तांत्रिक तपासालाही गती दिली. त्यावेळी तो मुंबई येथे असल्याचे समजल्यानंतर एक पथक मुंबईला गेले, मात्र काही तासांनी तो पुन्हा

पुण्यात बुधवार पेठेमध्ये फिरत असल्याचे पोलिसांना समजले. त्यानंतर पोलिसांनी त्यास सापळा रचून अटक केली. त्यास दारुचे व्यसन असून त्याने मौजमजेसाठी चोरी केल्याची कबुली दिली. पोलिसांनी त्याच्याकडून 17 हजार रुपयांची रक्कम जप्त केली. वरिष्ठ पोलिस निरीक्षक अरविंद माने, पोलिस निरीक्षक (गुन्हे) विक्रम गौड यांच्या मार्गदर्शनाखाली पोलिस उपनिरीक्षक अतुल क्षीरसागर यांच्या पथकाने हि कामगिरी केली.