खडकवासला : खडकवासला गावच्या हद्दीत मुख्य सिंहगड रस्त्याला लागून असलेल्या कार्यालयातील एक लॅपटॉप आणि एक प्रिंटर अशा सुमारे वीस हजार रुपयांच्या मुद्देमालाची दुचाकीवरून आलेल्या दोघांनी भरदिवसा चोरी केली असून चोरीची संपूर्ण घटना सीसीटीव्ही कॅमेऱ्यात कैद झाली आहे.याबाबत हवेली पोलीस ठाण्यात अज्ञात चोरट्यांविरुद्ध तक्रार दाखल करण्यात आली आहे.

खडकवासला गावचे माजी उपसरपंच संदीप मते यांचा सिमेंट विक्रीचा व्यवसाय आहे. मुकाई स्टील ॲंड सिमेंट एजन्सी या नावाने असलेल्या त्यांच्या खडकवासला येथील कार्यालयात पंधरा कर्मचारी कामाला आहेत.रोख रक्कम, चेक, कंप्युटर, लॅपटॉप, प्रिंटर व व्यवसायाच्या संबंधित इतर वस्तू व कागदपत्रे असा मुद्देमाल त्यांच्या कार्यालयात असतो.

रविवार दि. 17 ऑक्टोबर रोजी सुट्टी असल्याने ट्रान्सपोर्टचा व्यवसाय करणारे जयेश इंगुळकर हे एकटेच कार्यालयात काम करत बसले होते.दुपारी दिड वाजेच्या सुमारास इंगुळकर काही कामानिमित्त आतल्या खोलीत गेल्यानंतर दुचाकीवरून आलेल्या दोघांनी कार्यालयातील लॅपटॉप व प्रिंटर या वस्तूंची चोरी केली. सोमवार दि. 18 ऑक्टोबर रोजी नियमित कार्यालय सुरू झाल्यानंतर सीसीटीव्ही कॅमेऱ्यांच्या तपासणीतून हा प्रकार उघडकीस आला. तोंडाला मास्क लावलेला असल्याने चोरांची ओळख पटू शकली नाही. याप्रकरणी हवेली पोलीस ठाण्यात फिर्याद दाखल करण्यात आली असून महिला पोलीस नाईक रुपाली धिवार अधिक तपास करत आहेत.