पुणे : शहरातील मध्यवस्तीत लहान मोठ्या अनेक इमारती आहेत. या इमारतींवरील टेरेस चक्क भाड्याने दिले आहेत. अशा इमारतींवरील टेरेसवर तब्बल साडेपाचशे विक्रेत्यांनी आश्रय घेतल्याचे उघड झाले आहे. शहराच्या मुख्य रस्त्यावरील व पेठांमधील हे सर्व विक्रेते आहेत. त्यांची उपासमार होत असल्यामुळे नुकतेच पुणे जिल्हा महिला व बाल विकास कार्यालयाकडून त्यांना शिधा वाटप करण्यात आले. 

सोशल डिस्टन्सिंगचे काटेकोरपणे पालन करण्यासाठी मुंबईसह राज्यातील इतर ठिकाणी इमारतींच्या टेरेसवर जमणाऱ्यांवर ड्रोन कॅमेऱ्यांव्दारे लक्ष ठेवले जात आहे. त्याचवेळी मात्र पुणे शहरातील मध्यवस्तीमधील लहान मोठ्या अशा अनेक इमारतींवरील टेरेसच विक्रेते भाड्याने घेऊन राहत आहेत. 

पुण्याच्या इतर बातम्या वाचण्यासाठी येथे- क्लिक करा

सकाळपासून ते रात्री नऊपर्यंत रस्त्यावर त्यानंतर स्वयंपाक आणि झोपण्यासाठी टेरेस भाड्याने घेऊन राहत असल्याचे उघड झाले आहे. आता लॉकडाउनमध्ये संबंधितांची उपासमार होत आहे. त्यामुळे त्यांना मदत करण्याची भूमिका प्रशासनाने घेतली आहे. 

आणखी वाचा- वन्यजीवांसाठी "तो' उपक्रम ठरतोय..

शिवाजीरोड, बाजीराव रोड, लक्ष्मी रोडसह मध्यवस्तीतील पेठांमध्ये खेळण्यांपासून ते गृहोपयोगी वस्तूंची विक्री करणारे परराज्यातील साडेपाचशे विक्रेते आहेत. या सर्व विक्रेत्यांना शहरात घर भाड्याने घेणे परवडत नाही. त्यामुळे इमारतीवरील टेरेसच भाड्याने घेऊन राहणे पसंत केले आहे. या सर्व असंघटित विक्रेत्यांचे हातावर पोट असल्यामुळे गेले महिनाभर लॉकडाउनमुळे त्यांची उपासमार होत होती. त्यामुळे जिल्हा महिला बाल विकास अधिकारी कार्यालयाने त्यांना किराणा सामानाचे वाटप केले. 

चेतना महिला विकास संस्था आणि फरासखाना पोलिस ठाणे यांच्या मदतीने देहविक्री करणाऱ्या महिला व संबंधित विक्रेत्यांना शिधा वाटप करण्यात आले आहे. 

- अश्विनी कांबळे, जिल्हा महिला बाल विकास अधिकारी, पुणे