मंचर (पुणे) : घोडेगाव रस्त्यावर असलेल्या "गाडे पाटील ज्वेलर्स' या दुकानात पाच चोरटे चोरी करण्यासाठी आले होते; पण सुरक्षिततेसाठी लावण्यात आलेला सायरन वाजल्यामुळे त्यांचा चोरीचा डाव फसला. सदर चोरीची घटना मंगळवारी (ता. 7) पहाटे घडली. चोरटे सीसीटीव्ही कॅमेऱ्यात कैद झाले आहेत.

मंचर येथील छत्रपती शिवाजी महाराज चौकात घोडेगाव रस्त्यावर खंडू गाडे यांचे "गाडे पाटील ज्वेलर्स' दुकान आहे. सोमवारी (ता. 6) रात्री गाडे दुकान बंद करून घरी गेले. मंगळवारी पहाटे ज्वेलर्सच्या दुकानासमोर मोटारीतून पाच चोरटे आले. मोटार रस्त्यावर थांबवून एक जण बसून राहिला. चार चोरट्यांनी दुकानाचे शटर उचकटण्याचा प्रयत्न करत होते. त्या वेळी सायरन वाजल्याने तेथून चोरट्यांनी पळ काढला. सायरनच्या आवाजाने मंचर पोलिस घटनास्थळी आले. त्या वेळी पोलिसांनी सदर माहिती गाडे यांना मोबाईलद्वारे दिली. गाडे यांनी ताबडतोब घटनास्थळी येऊन दुकान उघडून पाहणी केली; पण सुदैवाने काहीही चोरीला गेले नसल्याने त्यांनी सुटकेचा निःश्‍वास सोडला.

दरम्यान, मंचर पोलिस ठाण्याचे पोलिस निरीक्षक कृष्णदेव खराडे यांच्या मार्गदर्शनाखाली पोलिस कर्मचाऱ्यांनी मंचर शहरात नाकेबंदी करून चोरट्यांचा शोध घेण्याचा प्रयत्न केला; पण चोरटे सापडले नाहीत. सीसीटीव्ही कॅमेऱ्यामध्ये पाच चोरटे मोटारीसह कैद झाले आहेत. अंदाजे 25 ते 30 वयाचे चोरटे होते. त्यांनी तोंडाला रूमाल बांधलेले होते.