पुणे : पाषाण येथील एका घरातून चोरट्यांनी सव्वाचार लाखांचा ऐवज लुटून नेला. घरातील ८० वर्षीय महिला व केअर टेकरचे हात व तोंड बांधून त्यांना चोरट्यांनी काठी व कोयत्याने मारहाण केली. ही घटना बुधवारी रात्री साडेसात वाजण्याच्या सुमारास घडली. याप्रकरणी चतुःशृंगी पोलिस ठाण्यात गुन्हा दाखल करण्यात आला आहे. याबाबत ८० वर्षीय महिलेने फिर्याद दिली आहे. त्यावरुन चौघांविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादीचा पाषाणमध्ये पंचवटी नावाचा बंगला आहे. त्यांचे पती निवृत्त वकील आहेत. ते अर्धांगवायूने ग्रस्त असून, बेडवर झोपून असतात. फिर्यादीचा मुलगा अमेरिकेत असतो. तर दोन विवाहित मुली पुण्यातच राहतात. आजारी पतीची काळजी घेण्यासाठी त्यांनी एक केअर टेकरची नियुक्ती केली होती.

पिंपरी-चिंचवडच्या बातम्या वाचण्यासाठी येथे ► क्लिक करा

बुधवारी रात्री साडेसात वाजण्याच्या सुमारास फिर्यादी, त्यांचे पती व केअर टेकर असे तिघे घरामध्ये होते. त्यावेळी चार चोरटे कोयता, सुरा व काठी घेऊन घरात घुसले. त्यांनी फिर्यादीच्या पतीची काळजी घेणाऱ्या केअर टेकरच्या पायावर काठीने व कोयत्याने मारुन त्यांना जखमी केले. यानंतर केअर टेकर व फिर्यादी यांचे हात व तोंड कापडाने बांधून घरातील सर्व सामान अस्ताव्यस्त पसरवून किमती ऐवज शोधण्याचा प्रयत्न केला. त्यापैकी एकाने ‘माल कोठे आहे’ अशी विचारणा करीत दोघांना मारहाण केली. त्यानंतर पहिल्या मजल्यावरील बेडरूमच्या कपाटात ठेवलेली २५ हजारांची रोकड, सोन्याचे दागिने असा चार लाख २५ हजार रुपयांचा ऐवज चोरुन नेला. या प्रकरणाचा तपास सहाय्यक पोलिस निरीक्षक संतोष कोळी करीत आहेत.
 

ताज्या बातम्यांसाठी डाऊनलोड करा ई-सकाळचे ऍप