पुण्यातील बावधनजवळ लव्हळे परिसरात हेलिकॉप्टर कोसळून दोन पायलटसह एका अभियंत्याचा जागीच मृत्यू झाला. ही दुर्घटना बुधवारी (ता. २) सकाळी साडेसात वाजण्याच्या सुमारास घडली. पायलट जी. के. पिल्लई, परमजीत सिंग आणि अभियंता प्रीतम भारद्वाज अशी मृत्युमुखी पडलेल्यांची नावे आहेत.

या अपघातात दोन पायलट आणि एका इंजिनिअरचा मृत्यू झाला आहे. हे हेलिकॉप्टर ऑक्सफर्ड गोल्फ हेलिपॅडपासून दीड किलोमिटरच्या अंतरावर कोसळल्याची माहिती समोर आली आहे. दरम्यान घटनेची माहिती मिळताच अग्निशमन दलाची ४ वाहने घटनास्थळी दाखल झाली तसेच रुग्णवाहिका देखील दाखल झाल्या.

लवळे येथील ऑक्सफर्ड गोल्फ क्लबच्या हेलिपॅडवरून हेलिकॉप्टरने सकाळी साडेसात वाजण्याच्या सुमारास उड्डाण केले. त्यानंतर अवघ्या चार ते पाच मिनिटांत सुमारे दीड किलोमीटर अंतरावर हेलिकॉप्टर अचानक कोसळले. हेलिकॉप्टरमधून दोन पायलट आणि एक अभियंता असे तिघेजण प्रवास करीत होते. हेलिकॉप्टर डोंगराळ भागात कोसळल्यानंतर आग लागली. हेलिकॉप्टरचे अनेक तुकडे होऊन ते विखुरले गेले होते. या भीषण अपघातात तिघांचा गंभीर जखमी झाल्यामुळे जागीच मृत्यू झाला. सकाळी दाट धुके होते. तसेच, तांत्रिक बिघाड झाल्यामुळे हेलिकॉप्टर कोसळल्याची शक्यता व्यक्त करण्यात येत आहे.

हे हेलिकॉप्टर दिल्ली येथील हेरिटेज एव्हिएशन कंपनीच्या मालकीचे आहे. हे हेलिकॉप्टर खासदार सुनील तटकरे यांना आणण्यासाठी जुहू येथे निघाले होते, अशी प्राथमिक माहिती आहे. स्थानिक नागरिकांनी अपघाताची माहिती पोलिसांना कळवली. याबाबत माहिती मिळताच पोलिस, तसेच पुणे आणि पीएमआरडीएच्या अग्निशामक दलाच्या जवानांनी घटनास्थळी धाव घेतली. जवानांनी आग आटोक्यात आणून मृतदेह रुग्णालयात नेण्यात आले.

महिन्याभरात हेलिकॉप्टर कोसळण्याची दुसरी घटना :

पुणे परिसरात हेलिकॉप्टर कोसळण्याची महिनाभरातील दुसरी घटना आहे. मागील २४ ऑगस्ट रोजी जुहू, मुंबईवरून हैदराबादकडे निघालेले हेलिकॉप्टर पाऊस आणि खराब हवामानामुळे पौड परिसरात कोसळले होते. या अपघातात पायलट किरकोळ जखमी झाला होता. या अपघातात सुदैवाने चौघेही प्रवासी सुखरूप बचावले होते.