वाघोली : दोन दुचाकीच्या समोरा समोरील धडकेत तीन जण मृत्युमुखी पडल्याची गंभीर घटना अष्टापुर फाटा येथे शनिवारी सायंकाळी साडेसात वाजण्याच्या सुमारास घडली. यामध्ये सहा वर्षीय मुलासह त्याच्या वडीलांचा समावेश आहे. प्रवीण सुनील पाटोळे (वय २८ वर्ष) व त्यांचा मुलगा राजवीर (वय ०६ वर्ष, दोघे रा. अष्टापुर तालुका हवेली), व यश शेखावत (वय २१ वर्ष, रा न्हावी फाटा, शिंदे पोल्ट्री फार्म जवळ, ता हवेली ) हे तिघे जण मृत्युमुखी पडले.

या प्रकरणी अक्षय अनिल पाटोळे (वय २९ वर्षे, रा-आष्टापुर ता. हवेली जि.पुणे ) यांनी फिर्याद दिली. लोणी कंद पोलीसांनी दिलेल्या माहितीनुसार, पाटोळे हे मुलासह दुचाकीवर अष्टापुर फाटा येथे दूध घालून घरी जात होते. यावेळी समोरून यश हा अती वेगात दुचाकीवरून येत होता. अष्टपुर फाटा येते दोन दुचाकींची समोरा समोर धडक झाली. यामध्ये प्रवीण हे जागीच मृत्यूमुखी पडले तर राजवीर हा उपचारा दरम्यान मृत्युमुखी पडला. तर दुसरा दुचाकी धारक यश हा पुण्यात उपचारा दरम्यान मृत्युमुखी पडला. या प्रकरणी यश याच्यावर हयगयीने वाहन चालवून दोघांच्या मृत्यूस कारणीभूत ठरल्याचे गुन्हा दाखल करण्यात आला होता. मात्र त्याचाही उपचारादरम्यान मृत्यू झाला. या घटनेने अष्टापुर परिसरात हळहळ व्यक्त करण्यात येत आहे.