पुणे, ता. १५ : रेल्वे विभागाकडून सुरू असलेल्या खोदकामात चिंचवड येथील बिजलीनगरमध्ये महावितरणची भूमिगत उच्चदाब वीजवाहिनी तीन दिवसांत तीनवेळा तोडण्यात आली. परिणामी प्राधीकरण स्विचिंग स्टेशनचा वीजपुरवठा खंडित झाल्याने सुमारे २० हजार ग्राहकांना मनस्ताप सहन करावा लागला. यात महावितरणचेदेखील मोठे आर्थिक नुकसान झाले.
महापारेषणच्या अतिउच्चदाब चिंचवड १३२ केव्ही उपकेंद्रातून महावितरणच्या चाकण २२ केव्ही वीजवाहिनीद्वारे प्राधीकरण येथील स्विचिंग स्टेशनला वीजपुरवठा केला जातो. या स्विचिंग स्टेशनमधून दोन उच्चदाब वीजवाहिन्यांद्वारे प्राधीकरण, निगडी व ओटास्कीम परिसराला वीजपुरवठा होतो. रेल्वे विभागाकडून बिजलीनगर येथे अस्तित्वात असलेल्या रेल्वे रुळाच्या बाजूला नवीन रुळ टाकण्याचे काम सुरू आहे. त्यासाठी खोदकाम करण्यात येत आहे. महावितरणची भूमिगत चाकण २२ केव्ही वीजवाहिनी असल्याची माहिती रेल्वे विभागाला देण्यात आली होती. मात्र योग्य काळजी न घेतल्याने खोदकामात भूमिगत वीजवाहिनी तोडण्यात आली. त्यामुळे तीनही दिवस महावितरणचे प्राधीकरण येथील स्विचिंग स्टेशन बंद पडले. परिणामी प्राधीकरण, निगडी परिसरातील २० हजार ग्राहकांचा वीजपुरवठा खंडित झाला होता.
रेल्वे विभागाच्या खोदकामात तोडलेली महावितरणची वीजवाहिनी जमिनीमध्ये तीन ते चार मीटर खोल आहे. खोदकामामुळे झालेल्या खड्ड्यांमध्ये पावसामुळे पाणी साचले आहे. अशा स्थितीत तोडलेली वीजवाहिनी दुरुस्त करण्यासाठी महावितरणकडून तीनही दिवस युद्धपातळीवर प्रयत्न करण्यात आले. यात २० मीटर नवीन वीजवाहिनी टाकण्यात आली. तसेच तोडलेल्या ठिकाणी एकूण ७ जॉइंट द्यावे लागले.