बारामती: राजकीय जीवनाच्या सुरुवातीला जपान, कॅनडा व अमेरिकेचा दौरा केला. वेळेचा सदुपयोग, प्रत्येक गोष्टीचा सखोल अभ्यास करणे व कमीत कमी बोलणे हे गुण घेण्यासारखे आहेत. जपान, कॅनडा व अमेरिका येथील पंतप्रधान व सीनेटर कार्यालयात काम करण्याची संधी मिळाली.

त्याचा फायदा मला पुढील सार्वजनिक जीवनात झाला. अशी माहिती ज्येष्ठ नेते शरद पवार यांनी दिली. विद्या प्रतिष्ठानच्या सुवर्ण महोत्सवी वर्षानिमित्त आयोजित तारांगण युवा फेस्टमध्ये आज शरद पवार यांची तुषार जगताप व प्राची जोशी या विद्या प्रतिष्ठानच्या दोन विद्यार्थ्यांनी प्रकट मुलाखत घेतली. या मुलाखतीतील एका प्रश्नाचे उत्तर देताना शरद पवार यांनी ही माहिती दिली.

जपान, कॅनडा या देशातील पंतप्रधान कार्यालयात व पंतप्रधाना समवेत एक दिवस काम करण्याची संधी मिळाली. तसेच अमेरिकेतील सिनेटर कार्यालयात देखील काम करण्याची संधी मिळाली. येथील कामकाज कसे चालते हे युनेस्कोमुळे मला जवळून पाहता आले त्याचा उपयोग मला भविष्यातील राजकीय जीवनात मोठ्या प्रमाणात झाला.

जपानी लोकांचा वक्तशीरपणा, सखोल अभ्यास करण्याची त्यांची प्रवृत्ती आणि कमी बोलून अधिक काम करणे हे गुण घेण्यासारखे असल्याचे त्यांनी नमूद केले.

आपल्या राजकीय प्रवासाची सुरुवात कशी झाली हे शरद पवार यांनी याप्रसंगी नमूद केले गोव्यावर पोर्तुगीजांचे राज्य होते तेव्हा आपण प्रवरानगर येथे शाळेत नववी शिकत होतो तेव्हा एका शिक्षकांचा पोर्तुगीजांनी केलेल्या गोळीबार मृत्यू झाला त्यावेळेस महाराष्ट्रात अनेक ठिकाणी सत्याग्रह झाला त्या सत्याग्रहात आपण सर्वप्रथम सहभागी झालं होतं हे आपल्या राजकीय जीवनाचे सुरुवात होते असे त्यांनी नमूद केले.

शालेय जीवनामध्ये अभ्यासात माझे मन फारसे रमत नसे, अभ्यासाव्यतिरिक्त मित्र गोळा करणे व लोक जमा करणे यात मला अधिक रस होता. भविष्यात त्या गुणाचा मला राजकीय प्रवासात फायदा झाला असे शरद पवार यांनी सांगितले.

ग्रामीण भागातील मुलींमध्ये देखील मोठ्या प्रमाणात कर्तृत्व असते, फक्त त्या कर्तृत्वाला योग्य संधी देण्याची गरज असते, असे शरद पवार यांनी सांगितले. ग्रामीण भागातून शहरी भागात जाताना फारसा बदल करण्याची काही गरज नसते आपल्या अंगी असलेले कर्तृत्व सिद्ध करून दाखवण्याची क्षमता असणे गरजेचे असते असा कानमंत्र त्यांनी मुलांना दिला.

लातूरच्या झालेल्या भूकंपाच्या संदर्भात शरद पवार यांनी सविस्तर विवेचन करताना कशी मदत पोहोचविली व कसे लातूरला पुन्हा उभे केले याचा किस्सा विद्यार्थ्यांसमोर विशद केला. याची नोंद जागतिक स्तरावर घेतली गेली हेही त्यांनी सांगितले.