भिगवण, ता. २१ : कुंभारगाव (ता. इंदापूर) येथील ग्रामदैवत श्रीलक्ष्मी देवीच्या यात्रेस शुक्रवारपासून (ता. २२) सुरुवात होत आहे. दोन दिवस चालणाऱ्या यात्रेनिमित्त धार्मिक व प्रबोधनपर कार्यक्रम ठेवल्याची माहिती सरंपच उज्ज्वला परदेशी व उपसरपंच स्वाती भोईटे यांनी दिली. यात्रेनिमित्त शुक्रवारी पहाटे मुर्तीस्नान व अभिषेक कार्यक्रम आहे. त्यानंतर ग्रामस्थांचे दंडवत व दंडवतानंतर सकाळी आठ वाजता गोड नैवेद्य, तर दुपारी चार वाजता चोळी पातळ कार्यक्रम आहे. रात्री बारा वाजता छबिना काढण्यात येणार आहे. छबिना मंदिरामध्ये पोहोचल्यानंतर आनंद जळवगाव (खानदेश) यांच्या लोकनाट्याचा कार्यक्रम आहे. शनिवारी सकाळी हजेरीचा कार्यक्रम आहे. दुपारी तीन वाजता निकाली कुस्त्याच्या फडाचे आयोजन केले आहे.