डोर्लेवाडी, ता.१ : सोनगाव (ता.बारामती) येथे टाळ मृदंगाच्या गजरात व अखंड शिवनामाच्या भजनात तल्लीन होत भाविकांनी महाशिवरात्रीनिमित्त पवित्र कऱ्हा नीरा नदीच्या संगमावर वसलेल्या सोनेश्वराचे दर्शन घेतले.
यंदा कोरोना नियमांचे काटेकोर पालन करून महाशिवरात्र उत्सवास परवानगी दिल्याने भाविकांनी समाधान व्यक्त केले. येथील मंदिरात पूजा महाभिषेक झाल्यानंतर पहाटे पासूनच भाविकांनी दर्शनासाठी हजेरी लावली होती. दिवसभर परिसरातील भजनी मंडळांनी भजने सादर केली. देवस्थान समितीच्या वतीने भाविकांना उन्हाचा त्रास होऊ नये यासाठी मंडप व दर्शन रांगेची व्यवस्था करण्यात आली होती. भाविकांना पोलिस पाटील चेतन ठोंबरे यांच्या वतीने खिचडीचा प्रसाद देण्यात आला. ग्रामपंचायतीच्या वतीने शुद्ध पाणीपुरवठा, लाइट व्यवस्था, गावातील स्वच्छता करण्यात आली होती. प्राथमिक आरोग्य केंद्राच्या वतीने आरोग्य सुविधा पुरविण्यात आल्या होत्या.
संदेश गीते व मित्र परिवार यांच्या वतीने रक्तदान शिबिराचे आयोजन केले होते. दरम्यान, उपविभागीय पोलिस अधिकारी गणेश इंगळे, जिल्हा परिषदेचे माजी अध्यक्ष विश्वास देवकाते यांच्या हस्ते सपत्नीक महापूजा करण्यात आली. यावेळी देवस्थान समितीचे अध्यक्ष अशोक गीते, पंचायत समिती सदस्य राहुल झारगड, सरपंच शुभांगी देवकाते, कुंदन देवकाते, काशिनाथ गोफणे, बापूराव बोडरे, सुभेदार मळेकर, अल्लाभाई मुलाणी आदी मान्यवर उपस्थित होते.

भाविकांनी घेतला पर्यटनाचा आनंद
सोनेश्वराचे पुरातन मंदिर हे कऱ्हा नीरा नदीच्या संगमावर आहे. शिवाय दोन्ही नद्यांना यात्रेवेळी मुबलक पाणी असल्यामुळे मंदिराकडे जाण्यासाठी नदीतून होडीची सोय असते. तसेच गीते वस्ती कडून सरळ रस्ताही आहे, मात्र भाविक दर्शनाबरोबर पर्यटनाचाही आनंद घेता यावे यासाठी होडीतून जाणे अधिक पसंत करतात.
.............................
00465