पारगाव, ता. २४ : लोणी (ता. आंबेगाव) येथे महाशिवरात्र यात्रा उत्सवानिमित्त मंगळवार (ता. १) रोजी विविध धार्मिक कार्यक्रमाबरोबरच गुरुवार (ता. ३) रोजी बैलगाडा शर्यतीचे आयोजन केले असून विजेत्या बैलगाडा मालकांना एकूण दीड लाख रुपयांची रोख बक्षीसे देण्यात येणार असल्याची माहिती यात्रा उत्सव कमिटीने दिली.
महाशिवरात्रीला सकाळी ९ ते १० देवास हारतुरे व मांडव डहाळे आणि दिंडी सोहळा, रात्री सात वाजता छबिना व पालखी मिरवणूक गुरुवारी सकाळी ९ ते ९.३० घोड्यांच्या शर्यती, ९.३० ते सायंकाळी ६.३० पर्यंत बैलगाड्यांच्या शर्यती आयोजित केल्या आहेत. विजेत्या प्रथम क्रमांकासाठी ५१ हजार रुपये रोख व फळीफोड गाड्यास एलईडी टीव्ही, दुसऱ्या क्रमांकासाठी ४१ हजार रुपये व फळीफोड गाड्यास कुलर, तृतीय क्रमांकास २५ हजार रुपये व फळीफोड गाड्यास कुलर आणि चतुर्थ क्रमांकासाठी १५ हजार रुपये व फळीफोड गाड्यास पंखा बक्षीस देण्यात येणार आहे. तर अखेरच्या शर्यतीत प्रथम क्रमांकास सात हजार रुपये, द्वितीय क्रमांकास पाच हजार रुपये बक्षीस देण्यात येणार आहे.