महाळुंगे पडवळ, ता. १४ : कळंब (ता. आंबेगाव) येथील आदिशक्ती कमलजादेवी माता मंदिराच्या शटरचे कुलूप तोडून अज्ञात चोरट्यांनी चांदीच्या पादुका चोरून नेल्या आहेत. गुरुवारी (ता. १३) पहाटेच्या सुमारास चोरीची घटना सुरू असताना सायरन वाजल्याने चोरटे घाबरून पळून गेले.
मंचर पोलिस ठाण्याचे पोलिस हवालदार राजेंद्र हिले यांनी घटनास्थळी भेट देऊन पाहणी केली. यावेळी आंबेगाव तालुका पंचायत समितीचे माजी सभापती वसंतराव भालेराव, भीमाशंकर कारखान्याचे माजी संचालक यशवंत कानडे, उद्योजक नितीन भालेराव, युवराज भालेराव, पुजारी शिवाजी उबाळे, नाथा गायकवाड यांच्यासह ग्रामस्थ उपस्थित होते. मंचर पोलिस ठाण्याचे पोलिस निरिक्षक सतीश होडगर यांनी मंदिरामध्ये सीसीटीव्ही कॅमेरे व मंदिर परिसरात सौर दिवे बसविण्याबाबत गावकऱ्यांना सूचना केली आहे, असे हिले यांनी सांगितले.