मोरगाव, ता. ३१ : अष्टविनायक तीर्थक्षेत्र मोरगावचा माघी यात्रा उत्सव उद्या मंगळवार (ता. १) ते शनिवार (ता. ५) या काळात संपन्न होणार आहे. उत्सवानिमित्त दरवर्षी भाविकांना माघ शुद्ध प्रतिपदा ते शुद्ध पंचमीपर्यंत श्रींच्या मुख्य मूर्ती गाभाऱ्यात जाऊन श्रींना जलस्नान घालण्याची पर्वणी असते. मात्र, कोरोनामुळे खबरदारीचा उपाय म्हणून भाविकांना मुक्तद्वार दर्शनाचा लाभ घेता येणार नाही. मात्र, गाभाऱ्याबाहेरुन नियमित दर्शन घेता येणार आहे.
याबाबत प्रशासनामार्फत आज वडगाव निंबाळकर पोलिस स्टेशनचे पोलिस उपनिरीक्षक सलीम शेख यांनी सूचना दिल्याची माहिती चिंचवड देवस्थान ट्रस्टचे विश्वस्त विनोद पवार व सरपंच नीलेश केदारी यांनी दिली.
मंदिराच्या चार दिशांना चार द्वार असून द्वार मंदिर ठिकाणी अनवाणी चालत जाऊन दूर्वा वाहण्याची प्रथा येथे प्रचलित आहे. तिथीचा क्षय आल्यामुळे बुधवारी (ता. २ पासून) ते शुक्रवार (ता. ४) पर्यंत केवळ तीन दिवस येथील द्वार यात्रा संपन्न होणार आहे. उत्सवानिमित्त गुरुवारी (ता. ३) मोरया गोसावी प्राप्त मंगलमूर्ती पालखी सोहळा चिंचवड येथून मोरगाव येथे सायंकाळी ७ वाजता येणार आहे. सालाबादप्रमाणे चालत आलेले सर्व नियोजित धार्मिक विधी व कार्यक्रम संपन्न होणार आहेत. भाविकांना बाहेरून नियमित दर्शनासाठी मंदिर सुरुच राहणार असल्याची माहिती विश्वस्त विनोद पवार यांनी दिली.