माळेगाव, ता. ५ : माळेगाव सहकारी साखर कारखान्याचा गळीत हंगाम सुरू होऊन १६० दिवस उलटले आहेत. प्रतिदिनी साडेआठ ते साडे नऊ हजार टनाने ऊस गळीत उरकले आहे. मात्र, अद्याप कारखाना कार्यक्षेत्रात १ लाख २० हजार टन ऊस शिवारात उभा आहे.
माळेगाव कारखान्याने आजवर १३ लाख २८ हजार २१० टन उसाचे गाळप केले. त्यामध्ये सभासदांचा ७ लाख १६ हजार टन, तर गेटकेनधारकांचा ६ लाख ११ हजार टन ऊस आहे. त्यानुसार मिळालेल्या ११.१५ टक्के उताऱ्याचा विचार करता १४ लाख ७३ हजार ३०० साखर पोती निर्माण झाली आहेत. मात्र, कारखाना कार्यक्षेत्रात अद्याप १ लाख २० हजार टन ऊस शिल्ल्क आहे. सध्या उन्हाची तीव्रता अधिक वाढल्याने तोडणी मजुरांच्या कार्यक्षमतेवर परिणाम झाला आहे. त्यामुळे प्रतिदिनी एक हजार टनाने गाळप खाली घसरले आहे. मात्र, शिवारातील शिल्लक उसाच्या क्षेत्राची तातडीने तोडणी व्हावी व वजनात घट येऊ नये, या उद्देशाने प्रशासनाने शिल्लक उसाचे नियोजन करावे, अशी शेतकऱ्यांची मागणी आहे.

याबाबत शेतकरी राजेश जाधव, सुभाष शितोळे म्हणाले, ‘‘माळेगाव कारखान्याने यंदा ऊस गाळपाचे उद्दिष्ठ १५ लाख टनापर्यंत ठेवले होते. त्यानुसार प्रशासनाने साडेतेरा लाख टन गाळप उरकले आहे. अर्थात हा गाळपाचा विक्रम कारखान्याच्या इतिहासात अभिमानास्पद वाटतो. हे जरी खरे असले तरी सध्या कार्यक्षेत्रातील शिवारात अद्याप सव्वालाख टनापर्यंत उसाचे पीक उभे आहे. हे क्षेत्र उन्हाची तीव्रता वाढल्याने कसे जगवावे? असा शेतकऱ्यांपुढे प्रश्न आहे. त्याचे गाळप लवकर उरकण्यासाठी प्रशासनाने प्रयत्न करावेत.’’