माळेगाव, ता. २४ः बारामतीनजिक नेपतवळ येथे रविवारी (ता. २४) एका मालवाहतूक टेंपोने माळेगाव साखर कारखान्याच्या ऊस वाहतूक करणाऱ्या ट्रॅक्टर गाडीला जोरदार धडक दिली. त्यामध्ये सहा ऊसतोड मजूर गंभीर जखमी झाले आहेत. जखमींनी कारखाना प्रशासनाला या घटनेची माहिती मोबाईलद्वारे दिल्याने संबंधितांना वेळीच वैद्यकीय उपचार मिळाले, अशी माहिती माळेगाव कारखान्याचे कार्यकारी संचालक राजेंद्र जगताप यांनी दिली.

बारामती-मोरगाव रस्त्याने माळेगावचे ऊसतोड मजूर पहाटेच्यावेळी ट्रॅक्टर गाडीने बारामतीच्या दिशेने निघाले होते. त्याचवेळी बारामतीच्या दिशेने निघालेला भरधाव माल वाहतूक टेंपोच्या चालकाचा आपल्या गाडीवरील ताबा सुटला आणि तो टेम्पो ट्रॅक्टरच्या मागच्या बाजूस आदळला. यात ऊसतोड मजूर भाऊसाहेब शेवाळ, बाजीराव तुकाराम जाधव, हिराबाई एकनाथ शेवाळ, एकनाथ चव्हाण, उषाबाई बाजीराव जाधव, अंजू अशोक चव्हाण (सर्व रा. पुई, ता.नांदगाव, जि. नाशिक, हल्ली मुक्काम माळेगाव ) हे जखमी झाले. दरम्यान, पाहुणेवाडी येथे मागील पंधरा दिवसांपूर्वी अशाचपद्धतीने माळेगावच्या ऊसतोड बैलगाड्यांना पहाटेच्यावेळी माल ट्रकने उडविले होते. त्या अपघातात दोन बैलांचा मृत्यू झाला होता, तर चौघे गंभीर जखमी झाले आहेत.