परिंचे,ता.११: बांदलवाडी (ता. पुरंदर) नजीक नारगेवस्ती येथे लागलेल्या वणव्यात फळबागेचे नुकसान झाले आहे. काळदरी गावचे सरपंच गणेश जगताप व बहिरवाडी गावचे सरपंच दशरथ जानकर यांनी वणवा पेटवण्यासाठी कारणीभूत ठरणाऱ्यांवर फौजदारी गुन्हे दाखल करण्याचा इशारा दिला आहे.
कुंभोशी, मिसाळवाडी परिसरातून या वणव्याला सुरवात झाली. पुरंदर किल्ल्याच्या शेजारी असलेल्या सुपलाई डोंगरावरून वणवा पेटत आला. बघता बघता रामवाडी, विठ्ठलवाडी,बांदलवाडी परिसरातील चराऊ रान व जंगल होरपळून निघाले. तुकाराम नारगे यांची हातातोंडाशी आलेली फळझाडे वणव्यात होरपळून निघाली. जनावरांचा चारा जळाल्याने चाऱ्याचा प्रश्न निर्माण झाला असल्याचे संजय नारगे यांनी सांगितले. वनविभागाबरोबर खासगी क्षेत्रात मोठ्या प्रमाणात नुकसान झाले आहे. संतोष कुढळे, जनार्दन जाधव, हनुमंत कुढळे, नवनाथ जाधव आदी शेतकऱ्यांनी एकत्र येऊन वणवा विझविण्यासाठी प्रयत्न केले. वणवे लावण्याचे सत्र थांबत नसल्याने बांधावरील फळ बागा जगवायच्या कशा, असा सवाल शेतकरी तुकाराम बाबूराव नारगे यांना केला आहे.
पुरंदर तालुका वन परिक्षेत्र अधिकारी विशाल चव्हाण यांच्याशी संपर्क साधला असता, संभाव्य ठिकाणी जाळ रेषा काढण्यात आल्या आहेत. वणवा लावणाऱ्या व्यक्तींवर कठोर कारवाई करण्यात येणार असल्याचे त्यांनी सांगितले.