घोडेगाव, ता १७ : राज्यातील अनुसूचित जमातीमधील विद्यार्थ्यांना शासकीय आश्रमशाळेतच दर्जेदार शिक्षण मिळावे. यासाठी राज्यातील १०० मूलभूत सुविधा उपलब्ध असलेल्या शासकीय आश्रमशाळा आदर्श आश्रमशाळा म्हणून तयार करण्यात येत आहे. त्यादृष्टीने पहिल्या टप्प्यात ३० शासकीय आश्रमशाळा या आदर्श आश्रमशाळा करण्यासाठी आदिवासी विकास विभाग अंतर्गत असलेल्या बांधकाम विभागाकडून आवश्यक ती कार्यवाही करण्यास सुरुवात झाली आहे. त्यापैकी घोडेगाव प्रकल्प अंतर्गत शासकीय माध्यमिक आश्रमशाळा राजपूर (गाडेवाडी, ता.आंबेगाव) या शाळेची निवड झाली आहे, अशी माहिती प्रकल्प अधिकारी बळवंत गायकवाड यांनी दिली.
राजपूरच्या शाळेमध्ये मुख्य प्रवेशद्वार, मल्टीपर्पज हॉल, डायनिंग हॉल, प्रयोगशाळा, संगणक कक्ष, स्वच्छतागृहे, धोबी घाट, ड्राईंग शेड, शालेय इमारत रंगकाम, म्युझिक रूम, वर्ग-३ व वर्ग-४ निवासस्थान, मुख्याध्यापक निवासस्थान, स्टोअर रूम व चौकीदार कक्ष या सुविधांचा समावेश केला आहे, अशी माहिती प्रकल्पस्तरीय समिती अध्यक्ष सुभाषराव मोरमारे, मुख्याध्यापक नरसाळे व्ही.एस.व नवनाथ भवारी यांनी दिली.
...........................................
01319