आपटाळे, ता. ६ : खामगाव (ता. जुन्नर) येथे आग्या मोहोळाच्या मधमाशांनी केलेल्या हल्ल्यात एक महिला गंभीर जखमी झाली. ही घटना शनिवारी (ता. ५) घडली. गेल्या दोन दिवसांपासून सततच्या होत असलेल्या मधमाशांच्या हल्ल्यांमुळे स्थानिक शेतकरी त्रस्त झाले असून, वनविभागाने तातडीने या मधमाशांचा बंदोबस्त करावा, अशी मागणी स्थानिक ग्रामस्थांनी केली आहे.
खामगाव येथे माणिकडोह धरणाच्या कॅनॉलवरील पुलाच्या खालच्या बाजूने जवळपास १० ते १२ मधमाशांच्या आग्या मोहोळाची पोळे आहेत. या रस्त्यावरून ये जा करणाऱ्या नागरिकांवर गेल्या दोन दिवसांपासून मधमाशा हल्ला करत आहेत. मधमाशांनी शेतावर जात असलेल्या सुनीता सुनील आहेर यांच्यावर हल्ला चढविला. यात त्या गंभीरपणे जखमी झाल्या असून त्यांच्यावर जुन्नर येथील शासकीय रुग्णालयात उपचार सुरू आहेत. तसेच येथील शेतकरी खंडू पानसरे, रवींद्र पानसरे, जालंदर शेलार, पांडुरंग कारभळ, रवींद्र कारभळ यांच्यावर देखील या मधमाश्यनी हल्ला करत जखमी केले आहे.
दरम्यान, रोकडे वस्तीवर मधमाशांच्या हल्ल्यात वसंत आनंदा रोकडे यांची एक शेळी मृत्यूमुखी पडली तर दोन शेळ्या गंभीर जखमी झाल्या आहेत. तसेच या हल्ल्यात अमोल शेळके, विशाल रोकडे, प्रणव रोकडे हे जखमी झाले असून सावरगाव येथील आरोग्य केंद्रात यांच्यावर उपचार करण्यात आले.