नसरापूर, ता. २० ः भोंगवली (ता. भोर) येथील लक्ष्मीनारायण देवस्थान ट्रस्टच्या जमिनीचे बोगस खरेदीखत करून विक्री केल्याप्रकरणी २०१९ सालामधील तत्कालीन सरपंच, ग्रामसेवक व सदस्यांसह १३ जणांविरुद्ध राजगड पोलिस ठाण्यात गुन्हा दाखल करण्यात आला आहे.

भोंगवलीचे विद्यमान ग्रामसेवक जकाप्पा बिराजदार यांनी याबाबत फिर्याद दिली आहे. त्यानुसार तत्कालीन ग्रामसेवक राहुल धोंडीबा शेलार, सरपंच निलम संदीप उल्हाळकर, उपसरपंच लीला उत्तम बाठे, सदस्य भगवान एकनाथ भांडे, जीवन हनुमंत निगडे, राजेंद्र विश्वास खोमणे, गणेश दत्तात्रेय सुर्वे, मनिषा संतोष शेडगे, चांदणी शिवाजी लंके, इंदूबाई संपत लंके व विक्री करणारे संतोष अर्जुन नलावडे, खरेदी करणारे दीपक गुलचंद चव्हाण, नीता दीपक चव्हाण सर्व (रा.भोंगवली ता.भोर) यांच्यावर गुन्हा दाखल करण्यात आला आहे. या प्रकरणी सहाय्यक पोलिस निरीक्षक नितीन खामगळ पुढील तपास करत आहेत.

प्रहार संघटनेचे भोर तालुकाध्यक्ष संतोष मोहीते यांनी याबाबत गटविकास अधिकाऱ्यांच्याकडे तक्रार केली होती. तक्रारदार मोहीते यांनी सांगितले की, भोंगवली येथे लक्ष्मीनारायण देवस्थानची सव्वा आठ गुंठे इतकी जमीन आहे. त्या जमिनीचे वहिवाटदार देवस्थान ट्रस्ट, पंच व सरपंच भोंगवली अशी ग्रामपंचायतीला नोंद असताना गावामधील संतोष नलावडे यांनी त्यातील एक गुंठा जमिनीवर खोट्या कागदपत्राव्दारे स्वतःची वारस नोंद केली व ती एक गुंठा जमीन दीपक गुलचंद चव्हाण व नीता दीपक चव्हाण यांना विक्री केली.