आंबेठाण, ता. ९ : भांबोली (ता. खेड) येथील भामचंद्र विद्यालयात ५३१ मुलांचे लसीकरण करण्यात आले. विद्यालयात २० किलोमीटर अंतरावरील शिवे, वहागाव, गडद येथून विद्यार्थी येतात. त्यामुळे सुमारे दहा ते बारा गावातील विद्यार्थ्यांचे लसीकरण करण्यात आले असल्याची माहिती विद्यालयाचे प्राचार्य संजय बोरकर यांनी दिली.
या प्रसंगी भांबोलीचे सरपंच भरत लांडगे, वासुलीचे उपसरपंच विक्रम पाचपुते, मोहन पाचपुते, ग्रामसेवक श्रीधर नाईकडे आदी उपस्थित होते.
करंजविहिरे प्राथमिक आरोग्य केंद्राच्या वैद्यकीय अधिकारी डॉ. जयश्री महाजन यांच्या मार्गदर्शनाखाली वराळे व कोरेगाव आरोग्य उपकेंद्राचे समुदाय आरोग्य अधिकारी सुशील पांडे, अवधूत डेरे, आरोग्य सेवक हरिदास टेकवडे, भारती राक्षे, आरोग्य मदतनीस अरुणा पानमंद, प्रियांका तनपुरे, निर्मला राऊत, अनिता गाळव आदींनी लसीकरण पूर्ण केले.
यावेळी नववी ते बारावीच्या (पंधरा ते अठरा वयोगट) ५३१ विद्यार्थ्यांना कोविड प्रतिबंध कोव्हॅक्सिन लस देण्यात आली. या कामी विद्यालयाच्या शिक्षक आणि शिक्षकेतर कर्मचारी यांनी आरोग्य विभागाला सहकार्य केले. यात रजिस्ट्रेशन, व्हेरिफिकेशन आदी कामात मदत केली. यावेळी विद्यार्थ्यांना लसीकरणानंतर ग्रामपंचायत वासुली आणि भांबोली यांच्या वतीने बिस्कीट वाटप करण्यात आले.