टाकळी हाजी, ता. १३ : ज्येष्ठ नेते शरद पवार यांच्या टाकळी हाजी (ता. शिरूर) येथील २५ डिसेंबर रोजीच्या दौऱ्यावेळी मलठण (ता. शिरूर) येथे चोरीचा प्रकार घडला होता. त्यातील एक आरोपी पकडल्याची माहिती शिरूरचे पोलिस निरीक्षक सुरेशकुमार राऊत यांनी दिली.

पोलिसांनी दिलेल्या माहितीनुसार, मलठण येथे ग्रामपंचायत कार्यालयासमोर शरद पवार यांचे स्वागत करण्यासाठी कार्यकर्ते थांबले होते. त्यावेळी गर्दीचा फायदा घेऊन रमेश सोन्याबापू गिते यांची तीन तोळ्याची चैन, नरेंद्र निवृत्ती वाव्हळ यांची दीड तोळ्याची चैन, शशिकांत
वाव्हळ यांची ५० हजार रुपयांची रोकड व नाना फुलसुंदर यांचा मोबाईल चोरीला गेला होता. याबाबत गिते यांनी फिर्याद दिली होती. त्यानुसार परिसरात सीसीटीव्ही फुटेजची पाहणी पोलिसांनी केली. त्यावेळी हे सर्व आरोपी करड्या रंगाच्या शेवरलेट कंपनीच्या मोटारीमधून आले होते.

तसेच, ओळख उघड होऊ नये म्हणून नेत्यासारखा पेहराव केल्याचे आढळून आले. या संशयिताचा शोध घेतला असता या गुन्ह्यातील सहापैकी ज्ञानेश्वर ऊर्फ माउली कल्याण जाधव यास शेवरलेट मोटारीसह (क्र. एमएच २० ईई ०४३१) गांधीनगर-बीड येथून अटक केली. त्याचे अन्य साथीदार फरारी झाले आहेत. या घटनेचा तपास पोलिस उपनिरीक्षक गणेश जगदाळे करत आहेत.