दौंड, ता. १३ : दौंड पोलिसांनी मटका जुगाराच्या अड्ड्यावर काम करणाऱ्या पंटरसह आकडे घेणाऱ्या चालकाविरुद्ध गुन्हा दाखल केला आहे. पोलिस निरीक्षक विनोद घुगे यांनी याबाबत माहिती दिली. दौंड पोलिसांनी १० जानेवारी रोजी खाटीक गल्लीकडे जाणाऱ्या रस्त्यालगत मटका जुगाराचे आकडे घेणारा विनोद राजू गायकवाड (वय २७, रा. वडार गल्ली, दौंड) यास ताब्यात घेतले. त्याच्याकडून बाराशे पस्तीस रुपये आणि जुगाराचे साहित्य जप्त केले. चौकशीत विनोद गायकवाड याने जुगाराचे आकडे रमेश एस. जाधव (रा. गोवा गल्ली, दौंड) याच्यासाठी घेत असल्याची माहिती दिल्याने कॅान्स्टेबल रवींद्र काळे यांच्या फिर्यादीनुसार मटका अड्डाचालक रमेश जाधव व विनोद गायकवाड या दोघांविरुद्ध गुन्हा दाखल करण्यात आला आहे. रमेश जाधव याच्याविरुद्ध दौंड पोलिस ठाण्यात यापूर्वी जुगारप्रकरणी गुन्हे दाखल आहेत.