सासवड शहर, ता. ७ : ‘‘कोरोना संसर्ग आटोक्यात ठेवण्यासाठी सर्व नागरिक, व्यापारी आणि विद्यार्थ्यांनी मास्क, सोशल डिस्टन्सिंगचे पालन करावे. नागरिकांना कोरोना प्रतिबंधक लशीचे दोन डोस घ्यावे. तसेच १५ ते १८ वयोगटातील विद्यार्थ्यांच्या लसीकरणाचे प्रशासनाने तातडीने नियोजन करावे. पुरंदर तालुक्यात कोरोना संसर्ग अद्याप आटोक्यात असल्याचे आमदार संजय जगताप यांनी सांगितले.

सासवड नगरपालिकेत व्यापारी, डॉक्टर, माध्यमिक विद्यालये आणि कॉलेजचे प्रतिनिधी यांची बैठक झाली. या वेळी ते बोलत होते. मुख्याधिकारी निखिल मोरे, पोलिस निरीक्षक अण्णासाहेब घोलप, ग्रामीण रुग्णालयाचे अधीक्षक डॉ. किरण राऊत आदी या वेळी उपस्थित होते.
विनामास्क फिरणाऱ्यांकडून पाचशे रुपयांचा दंड वसूल केला जाईल. गर्दी झाल्यास संबंधित कार्यालयाच्या आस्थापनेवर आणि दुकानदारांवर दंडात्मक कारवाई करण्यात येणार आहे. नागरिकांनी कोरोना लसीकरणाचे प्रमाणपत्र जवळ बाळगणे गरजेचे आहे. दुकानदारांनी ग्राहकांना मास्क शिवाय दुकानात प्रवेश देऊ नये, तसेच संबंधित सूचनांचे फलक लावावेत. तसेच पान टपरीच्या आजूबाजूला थुंकल्याचे आढळल्यास थुंकणारा आणि टपरी चालकांवर दंडात्मक कारवाई करण्यात येणार असल्याचे मोरे व घोलप यांनी सांगितले.
नागरिकांनी मास्क, सोशल डिस्टस्निंगच्या पालनाबरोबर स्वतःचे, कुटुंबाचे आणि व्यापाऱ्यांनी दुकानातील कर्मचाऱ्यांचे लसीकरण करून घेणे बंधनकारक असल्याचे डॉ. राऊत यांनी सांगितले.